Parlamento a aproba mocion entrega pa Otmar Oduber cu ta duna instruccion na gobierno pa trece solucion structural den sistema hudicial

Ayera mainta a tuma luga e reunion publico den Parlamento di Aruba, a peticion di fraccionnan AVP, Futuro y PPA, pa loke ta trata e politica di investigacion y acercamento pa cu e incidente tragico recien na unda e hoben di 19 aña, A. Lanoy, a perde su bida durante un persecucion cu a termina cu un tiroteo fatal. Un aspecto cu a hala atencion desde inicio ta e hecho cu Ministerio Publico (OM) no tabata presente na e reunion, cual a ser cuestiona.

Lider di fraccion di PPA y un di e parlamentarionan cu a firma pa yama e reunion publico aki, Otmar Oduber, a cuestiona dicon OM no ta presente na e reunion. Oduber a remarca cu e peticion pa e reunion publico a ser firma pa seis miembro di parlamento cu ta di opinion cu un reunion publico na unda tanto e minister responsabel, como tambe instancianan concerni manera entre otro KPA y Ministerio Publico mester por responsabilisa nan mes pa cu e maneho cu ta ser hiba, como tambe aclaria e preocupacionnan cu ta existi cerca famianan y comunidad den su totalidad.

Oduber a subraya cu e reunion ta uno hopi categorico cu Ministerio Publico mester tabata t’ey presente. El a indica cu e investigacion riba su mes no ta importante, pero ta tur loke ta rond di e investigacion aki ta loke ta parlamento kier atende cune. “Parlamento tin un rol pa percura p’e transparencia y confiansa di e sistema hudicial. Pa promove y sigura esaki na comunidad di Aruba y no ta por nada a pidi Cuerpo Policial y Ministerio Publico responsabilisa nan mes na parlamento,” el a bisa.

Minister di Husticia demisionario, Rocco Tjon, como minister encarga y responsabel a splica cu Ministerio Publico no ta presente pasobra e peticion pa e reunion publico ta riba e politica di investigacion y acercamento pa cu e incidente tragico. El a remarca cu pa loke ta contenido di investigacion Ministerio Publico no lo por comparti nada y den un reunion publico ta e minister encarga hiba palabra y pues pa e motibo ey Ministerio Publico no lo por a hiba palabra.

“E peticion pa e reunion publico ta cla cu ta riba onderzoeksbeleid y aanpak pa motibo di e incidente tragico y ta esey mi ta bin awe pa contesta e preguntanan. Ami ta e ultimo responsabel pa cu esaki, pues mi lo por contesta tur e preguntanan cu tin pa loke ta trata e maneho specifico di Ministerio Publico, entre otro, ora ta trata e tipo di casonan aki. Pa e motibo ey Ministerio no lo por contesta ningun pregunta tampoco riba e detayes di e investigacion y den esaki KPA tampoco no por haci esey pasobra nan no ta envolvi den e investigacion,” e mandatario a splica.

Na final di e reunion cu a dura mas di seis ora, parlamentario Oduber a entrega un mocion, cual a ser aproba unanimamente pa tur fraccion den parlamento.

E mocion entrega ta indica cu e suceso recien na unda e hoben A. Lanoy di apenas 19 aña a perde su bida den un forma tragico lagando atras un yiu chikito y un famia inconsolabel, ta un suceso tragico cu no por ni mag presenta su mes un biaha mas. Un suceso cu a laga pueblo di Aruba hopi conmovi, y cu alabes ta vocifera nan preocupacion y indignacion tocante e proceduranan hiba den e caso aki.

E mocion ta indica tambe cu Cuerpo Policial di Aruba, cu tin e trabou di mantene y salvaguardia orden publico pa medio di ehecucion di leynan relevante, tambe a expresa nan lamenta pa cu e incidente tragico aki, mester por sigui depende riba e confiansa di pueblo cu nan t’ey pa mantene orden publico.

E mocion ta señala cu Cuerpo Policial di Aruba y su sindicato kier mantene y salvaguardia orden publico pa medio di ehecucion di leynan relevante, a expresa di ta desea di tin suficiente instrumento pa ehecucion di un maneho mas efectivo y transparente pa salvaguardia seguridad di e ciudadano pero tambe di e agentenan policial.

Ademas e mocion ta remarca cu un grupo grandi di e pueblo ta haya cu tin un falta di transparencia di Ministerio Publico den e maneho di investigacion di e reciente caso tragico.

Teniendo tur e puntonan aki na cuenta, e mocion ta duna instruccion na Gobierno di Aruba pa dentro di un termino determina, entrega cu maximo prioridad e leynan necesario yega Parlamento di Aruba pa ehecuta un maneho cu ta inclui, entre otro, “body camera y dashboard camera” mas efectivo, transparente y sigur pa tanto e miembro di Cuerpo Policial como tambe e ciudadania, den mantencion di orden publico.

Tambe ta pidi gobierno pa entrega prome cu tratamento di presupuesto 2025, pero dentro di un tempo maximo di un luna na parlamento un rapport cu tur e prioridadnan di Cuerpo Policial y un plan di alocacion di fondonan necesario pa inversion den training, sosten psicologico y materialnan necesario pa e miembronan di Cuerpo Policial pa nan por sinti mas prepara y sigur den ehecucion di nan funcion.

E mocion ta duna instruccion pa Gobierno di Aruba prepara un “plan van aanpak” pa atende a corto, medio y largo plazo cu e scarsedad halto cu ta existi caba pa mas di 20 aña, pa loke ta e falta di personal den Cuerpo Policial.

Tambe a pidi pa pone a corto plazo na disposicion di Cuerpo Policial, entre otro, un sistema di sosten psicologico na e personal di Cuerpo Policial pa medio di entre otro psicologonan interno como tambe externo pa tanto sesion obligatorio como di iniciativa propio.

E mocion a pidi gobierno pa presenta dentro di seis luna leynan necesario na parlamento pa haci drugtest un proceso regular den e Cuerpo di Polis, pa haci un estudio di e necesidadnan pa introduci un seguro (risico verzekering) y asina yama prima di peliger pa e servicio di vigilancia, y por ultimo a pidi pa percura pa un investigacion husto, transparente y imparcial tuma lugar unda comunidad por keda informa y convenci den e obhetividad cu esaki ta tuma lugar y asina reconfirma e confiansa cu comunidad mester tin den su sistema hudicial.

Lesa mas di e reunion publico den nos siguiente edicion di Bon Dia Aruba.