E aprobacion di e ley ‘effectenverkeer’ ta nifica cu awor por introduci un sistema di licencia pa personanan cu kier traha den e mercado financiero pa loke ta trata balor, sea bende, cumpra, intermedia of esunnan cu kier trece bolsa di balor. Banco Central ta haya e autoridad pa supervisa e mercado y tur e actividadnan encera.
Den e reunion na parlamento durante e tratamento di e ley, tambe a participa e miembronan di e colegio di supervision CAFT. E ta a base di un recomendacion di FATF, ya den pasado nan a yega di tene diferente reunion relaciona cu rekisitonan di Financial Action Task Force (FATF) pa combati e labamento di placa di dudoso procedencia of “placa sushi” cu ta wordo uza pa financia organisacion terorista y pa crimen organisa.
“E ley aki ta sumamente importante y e hecho cu e la wordo aproba, ta un otro cumplimento cu nos ta realisa pa loke ta trata e exigencianan di FATF y asina nos ta keda riba e bon ruta pa e evaluacion local den e proximo añanan”, asina minister Angel Bermudez di Finansa ta bisa den su relato.
Recomendacion number 26
Parlamentario Chris Dammers (AVP) ta splica cu e tabata pa cumpli cu e rekisito number 26 di FATF. E recomendacion aki tin di haber cu regulacion y supervision di institutonan financiero. Ta asina cu tur pais mester entre otro sigura cu e institucionnan financiero lo ta bou un regulacion y supervision adecua; y cu nan por implementa efectivamente e recomendacion di GAFI.
GAFI ta un Grupo di Accion Financiero Internacional cu ta un institucion inter gubernamental cu a wordo estableci na 1989. E mandato di GAFI ta esun di fiha e reglanan y promove e implementacion efectivo di medidanan legal, regulatorio y operativo pa combati e labamento di placa, financiamento di terorismo y otro tipo di organisacion criminal. Pero tambe otro sorto di menasa contra integridad di e sistema financiero internacional.
Bon nomber
“Semper bo mester tin bon nomber y cumpli cu e rekisitonan di FATF, sino pa un pais ta bira dificil. Bo ta bay riba un lista preto”, asina e parlamentario a declara riba e consecuencia pa pais Aruba si e tipo di recomendacion aki no tin e debido atencion. Igualmente el a bisa cu ora cu un pais ta cay riba e lista preto di FATF, ta dificil pa haya un bon recomendacion of credito externo y evaluacion di IMF (Fondo Monetario Internacional)of otro instancia internacional cu ta evalua bo pais.
Tur fraccion a vota pro e ley aki. E minister ta splica den su relato un biaha mas e importancia di e ley:
“Den pasado tabata tin incidentenan, manera e caso di Stanford Bank, unda cu un grupo grandi di Arubiano keda defrauda pa e banco y hopi hende a nan perde placa. Segun e Minister Bermudez e ley aki precisamente ta evita cu tipo di situacion asina bolbe sosode riba nos isla. Esaki ta e tipo di incidentenan cu nos kier evita y cu ta pone cu awe pa dilanti e actividadnan aki unda cu ta wordo ofreci interes halto pa e tipo di ahoronan aki lo cay bou supervision di Banco Central.”
Crowd funding
Na mes momento e mandatario ta splica den su relato cu e ley aki ta forma un base legal pa futuro actividadnan nobo den tereno financiero. Pues asina cu bin novedad pa cu financiamento por ehempel un “crowd funding” of via otro forma unda cu bo ta ofrece papelnan di balor na publico pa despues bo haya e capital pa financia cierto actividad comercial.
Na momento cu novedadnan aki tuma luga cu ta trece hopi inversion tambe cu n’e, e ley aki ta vigente caba y esaki no solamente ta garantisa cu e actividadnan aki por ta bon vigila y cu nan tin e supervision adecua, pero e consumidor tambe ta keda proteha di un manera sigur unda cu e por haya un sentimento cu su inversion ta wordo cuida y supervisa.
