Parlamento di Aruba, cu presencia minimo di parlamentario como medida di precaucion en conexion cu coronavirus, a vota pa aproba e presupuesto adapta pa 2020. A vota pro 12 parlamentario presente y no tabatin voto contra.
E presupuesto ta mustra un deficit di Afl. 1.266 miyon, producto di entrada cu a keda limita na Afl. 885 miyon, algo mas di mita di e presupuesto original. Di otro banda, e gastonan a subi te na Afl. 2.152 miyon, gran parti di e aumento ta e Afl. 683 miyon cu ta dedica na e plan di emergencia pa salvaguardia entrada pa empleado cu a perde trabao, y pa empleado cu a haya reduccion di salario pa motibo di situacion financiero di e empresa. Tambe un suma pa atende problema di empresa mediano y chikito cu a perde nan negoshi y Afl. 40 miyon pa un plan di inversion.
