Parlamento a aproba Ley di CITGO y Valero

Den un ambiente tumultuoso parlamento a continua ayera cu tratamento di e ley encuanto e refineria. Presidente di parlamento a mustra cu e no por domina e sala, cu specialmente ora oposicion tabata na palabra, tabata haci un desorden di otro mundo sin cu e presidente tabata expresa un debil “si boso no coopera, mi mester schors e reunion”.

Locual no tabata haci naturalmente ningun impresion y tabata parce manera ta manda el a manda nan. Naturalmente e no por menasa cu desocupa e tribuna, pasobra ta su mes hendenan tabata molestia e oradornan di oposicion. Un berguensa total pa un parlamento, pero ta parce cu nos mester custumbra cu e cosnan aki.

Un gran parti di e dia a bay na discursonan elocuente pero predecibel di Prome Ministro y ministro encarga cu energia. Un biento fresco tabata e ministro encarga cu Salubridad Publico, cu a limita su mes na contesta e preguntanan haci y manteniendo respet na tur momento. Un prueba cu bo no mester ta haci bochincha pa bo impresiona. Chapeau!

Di parti di oposicion tabatin hopi ripiticion di pregunta y realmente no a haci bon uzo di e tempo disponibel pa haya sa mas detaye. Preocupacion, mescos cu e dia anterior tabata concerni e garantianan, e trahadonan cu mester bin di exterior y e posicion di e trahadonan local. Tambe e preocupacion pa medio ambiente, specialmente pasobra manera gobierno a admiti, legislacion al caso mester bin parlamento ainda den curso di otro aña. A bin dilanti tambe e asunto di un ‘landfill’ cu mester bin riba e tereno y pakico esaki ta bay sirbi. No a bin un contesta contundente riba esaki.

Den e votacion final tabatin un solo voto contra, di Marisol Tromp, cu a keda para firme riba su punto di bista cu Aruba y San Nicolas merece un otro futuro mas sostenibel. E fraccionnan completo di AVP, MEP y PDR a vota na fabor di e ley.