Ayera mainta, Minister di Finanzas, Economia y Cultura, Xiomara Maduro tabata den Parlamento pa trata aprobacion di e ley cu ta regla e validez di acuerdonan cera di forma electronico.
E cantidad di actividadnan di comercio y servicio financiero cu ta sucede di forma electronico a aumenta drasticamente. Teniendo cuenta cu e desaroyo di e-commerce (comercio cibernetico) ta sumamente necesario pa brinda e usuarionan seguridad na momento di haci transaccion via medionan electronico na Pais Aruba, segun e comunicado di prensa aki.
E mandatario ta informa cu e ley aki ta pa elimina incertidumbre na momento di haci transaccionnan via medionan electronico. Alabes e ley ta pa garantisa e derecho y obligacionnan cu ta surgi for di acuerdonan comercial cera den un forma digital. Ademas e ley ta brinda seguridad legal pa usuarionan y ta reconoce legalmente un firma digital mescos cu un firma skirbi na man.
Cu aprobacion di e ley aki Gobierno di Aruba ta crea un structura legal mas sigur di e-commerce na Pais Aruba. Minister Xiomara ta enfatisa cu e ley aki ta un paso necesario den e era di economia moderno den cual e actividadnan comercial y comunicacion ta sucede di un manera digital, segun e comunicado ta finalisa.
