Diaranson ultimo, Parlamento di Aruba a aproba tambe e cambio di Ley di Free Zone, un cambio di ley cu ta necesario pa modernisa Free Zone y pa por introduci un lista di servicionan nobo door di empresanan estableci den di Free Zone.
Awor cu e ley di Free Zone a wordo modifica, e siguiente paso ta pa formalisa un Landsbesluit houdende algemene maatregelen, den cual ta specifica cua servicionan por wordo ofreci door di un compania estableci den Free Zone.
E Landsbesluit cu ta contene e lista di servicionan nobo cu lo por wordo ofreci door di un compania estableci den Free Zone ya caba ta den preparacion y pronto lo wordo formalisa, segun un comunicado di gobierno. E proceso pa formalisa e Landsbesluit ta un proceso largo cu pa varios luna ta den preparacion, mirando cu esaki mester wordo aproba tambe door di Organisation for Economic Cooperation and Development (“OECD”).
E vision di Minister Wever di Asuntonan Economico ta pa modernisa e legislacion di Free Zone di tal forma cu ta haci Free Zone di Aruba internacionalmente competitivo y cu por atrae empresanan nobo pa bin establece nan mes den Free Zone di Aruba, dunando asina un contribucion na e diversificacion di Aruba su economia, creando cuponan di trabou nobo, un spin-off general y entrada nan nobo pa Pais Aruba.
“Nos ta traha duro pa diversifica nos economia y ta kere cu e cambio den legislacion di Free Zone ta un paso importante pa logra esaki. Nos ta spera cu e oportunidad nan nobo ta capta e interes di empresarionan y inversionistanan internacional y cu nan lo probecha di esaki y bin establece nan mes na Aruba”, segun Minister Geoffrey Wever.
