E reunion ayera den Staten a bay den un forma turbulento unda oposicion a critica e presion pa trata 5 ley prome cu e parlamento ta cera pa fin di aña cuminsando 21 di december.
Un di e tareanan mas importante di parlamento ta cu mester controla e gobierno. Segun oposicion nan por a haci nan trabou e ora debidamente. Banda di esaki dos di e cinco leynan tin un conseho negativo di e organo di consulta Raad van Advies, pero cu gobierno a haya un banda.
Sinembargo presidente di parlamento Mervin Wyatt Ras a keda pusha e agenda y finalmente a logra cu Staten a aproba 5 ley den 1 dia.
Un cu a keda atras den e tratamento di e presupuesto pa 2017 tabata esun di Raad van Advies. Esaki ta e organo di consulta halto cu entre otro ta analisa proposicionnan di ley riba efectividad. Parlamento a vota den forma unanimamente pro e ley aki.
E otro tabata esun di e presupuesto complementario 2016 cu mester pasa prome cu aña ta bolter. Den cu esaki gobierno a scapa na ultimo momento como cu mayoria di parlamento a aproba esaki ayera. Presidente di Staten Sra. Ras ta informa cu e fraccion AVP tambe a bin cu un amienda pa cambia e presupuesto di Staten mes cu ta encera cu e placa cu a resta di 2016 pa cu gastonan, pa inverti esaki den otro destinonan, esta e siguridad di parlamento, IT y tambe airco.
Hopi importante ta cu Staten tambe a aproba e cuenta anual di 2015. E cuenta aki ta duna un bista riba e placa cu gobierno real a gasta den e aña aki y si a cumpli cu su metanan proponi den e presupuesto di 2015.
E otro ley cu a keda aproba ta esun cu ta cambia e ley actual di impuesto riba vehiculonan, y ta encera entre otro cu gobierno tin mas instrumento pa cobra e impuesto y tambe duna multa.
Finalmente Staten tambe a aproba un ley cu ta regla e instalacion di diferente ministerionan, como cu sr. Otmar Oduber a kita como minister di Turismo. Asina minister Mike de Meza a tuma su cartera over y tin un minister nobo esta Richard Arends cu awor ta encarga cu Economia y Telecom.
Presidente Ras ta informa cu awe lo tuma despedida di gobernador Fredis Refunjol.
