Awe finalmente a drenta e noticia di e huramentacion di esunnan cu definitivamente lo bay forma parti di e Parlamento nobo, debi cu e Gobierno nobo, Gabinete Wever Croes II ta cla caba.
Ya caba por a mira con dilanti y pariba di Parlamento tabatin movecion, unda ta cera caminda pa haci algun trabou.
Un total di ocho persona lo wordo huramenta pa 9’or di mainta dilanti Gobernador interino Yvonne Lacle. Esnan cu lo huramenta diabierna ta e dos candidatonan di Raiz kendenan ta Raymond Kamperveen y Misha Raymond.
Di parti di MEP ta bay uni nan mes na Hendrik Tevreden y Edagrd Vrolijk, kendenan a huramenta caba, e siguiente candidatonan: Arthur Vallejo, Alvin Molina, Shailiny Tromp Lee, Ady Thijsen, Setty Christiaans, Darlene Guedes. E dosnan cu ta debuta den Parlamento ta Vallejo y Molina.
Gobernador mes, Alfonso Boekhoudt, no por haci e huramentacion pa motibo cu e ta den exterior.
Segun por a comprende, awe pa mey anochi, esunnan cu ta bay bira Minister, lo no ta den e funcion di Parlamentario mas. Ta trata aki di Endy Croes, Rocco Tjon, Glenbert Croes, Dangui Oduber, Xiomara Maduro y Evelyn Wever Croes.
E dos Ministernan pa partido RAIZ ta Ursell Arends y Geoffrey Wever.
Di otro banda, ta preparando pa e ceremonia di huramentacion di e Ministernan tambe tuma luga riba diabierna. Ta haciendo tramite pa esaki por tuma luga diabierna rond di 6’or di atardi. Si no logra keda cla cu tur e preparacionnan, esaki lo nifica cu e huramentacion lo tuma luga te dialuna mainta. Aruba lo pasa un fin di siman sperando pa su gobierno nobo Gabinete Wever Croes II.
