Parlamentarionan ta di acuerdo: Castigo maximo pa abuso di mucha mester aumenta, prevencion tambe

Atende cu Corte. Esey ta locual Parlamentarionan a trece dilanti durante e reunion publico riba e ley Aumento di Castigo Maximo pa Casonan contra Moralidad, Eliminacion di e Termino di Caducacion di e delito y mehoracionnan.

No tabatin ningun Parlamentario cu tabata contra di e ley. Sinembargo, tur ta consciente cu e ley riba su mes no lo trece satisfaccion y solucion pa e casonan di abuso di no cumpli cu varios otro punto cu ta cay den e area social y di educacion.

Drs. Mervin Wyatt Ras di fraccion di AVP a enfoca hopi riba e balor pa haci muchanan resistente. E ta nifica cu mester siña nan di chikito con pa reconoce actitudnan inapropia, pa nan por defende nan mes mas tanto posibel. Un educacion asina lo mester sosode na cas, pero scol por hunga un papel mas grandi. Pa e Parlamentario di AVP, cu a traha na Departamento pa Asuntonan Social tambe a haci un yamada na autoridadnan competente, pa tira bista riba e uzo di medionan social pa acerca hobennan, y influencia nan di tal manera cu ta haci mas facil pa abusa di nan despues.

Ricardo Croes di RED a bisa cu na momento cu ta discuti e ley, tin hopi movecion den comunidad, cu ta organisa manifestacion y ta expone casonan riba nan propio pagina di Facebook. Specificamente ta papia di e pagina Aruba sex offender, pedophile public registry cu tin un manifestacion grandi planea pa dia 3 di juli. Aunke cu e ta sostene e grupo aki den nan lucha, e ta adverti si cu mester corda semper cu un medaya tin dos banda. No sin mas por publica nomber di un persona, pasobra tin casonan na Aruba mes, unda un tata a bay cera, acusa di a abusa su yiunan y despues a resulta cu tabata un acusacion falso, como venganza. “Tin hopi hende ta kibrando silencio y ta conta nan storia y na man di ken. Pero tin varios banda, Pasobra tambe, lamentablemente, pa motibo di divorcio, tin mama a acusa tata inocentemente, sin cu tabatin prueba.”

“Pero mi ta puntra mi mes si e aumento di castigo den ley ta bay duna e resultado desea,” Croes a bisa. Croes a splica cu e ley cu a trata ayera no a trata e lista di prueba cu ta necesario.

Pero mas cu tur cos, pa evita abuso, prevencion mester ta punto di salida na tur nivel. Na scol, muchanan por siña exactamente e aspectonan con pa reconoce cua ta e mishimentonan inapropia cu nan por e ora denuncia esakinan. “Prevencion di abuso di mucha mester ta punto di salida, continuacion y e final di un desaroyo cu ta afecta un mucha pa resto di su bida. Un mucha cu despues tambe lo por bira un abusado despues si e no haya un tratamento.”

E Parlamentario di RED a ilustra cu abuso di mucha no ta limita na Aruba, y no ta mara na clase social of posicion economico. El a ilustra con hustamente e siman aki, hues na Den Haag a sentencia un docente na scol di su nietonan despues cu a comproba cu e homber a mishi cu mucha. “Huez a duna e sentencia di apenas un aña di castigo pa su abuso.”

Abusadornan di mucha ta memey den famia, ruman, pero tambe entre personanan di confianza, na scol, na oficina di dokter, na club deportivo, hasta den Iglesianan, incluso Iglesia Catolico. Ademas, e scandal di Jeffrey Epstein a mustra con lidernan politico mundial, hasta miembronan di casnan real, ta envolvi cu abuso di mucha. “No kere cu abuso di mucha ta sosode solamente unda tin problema social of economico. Mi lo desea cu den e comunidad chikito di Aruba cu e ta stop. Y e por stop unicamente si nos pone nanishinan den mesun direccion.” Deteccion di casonan di abuso ta esencial pa Ricardo Croes y el a enfatisa esaki tambe den e proyecto di Crisis Plan Sociaal. “E mucha ta bira un adulto cu ta confronta problema personal, sexual pa resto di su bida. Abuso di mucha ta un realidad amargo di Aruba, y mi ta sostene e ley pa varios motibo. Pero mester mira si aumenta e castigo, si berdad Hues ta bay aplica esaki manera mester ta. Y si bin cu castigo minimo, Huesnan lo no aplik’e tampoco. Pakico? Pasobra no ta solamente cuestion di castiga actonan cometi. E ta rekeri tratamentonan, e ta exigi investigacion forensico.” Croes a bisa locual mayoria Parlamentario a trece dilanti, esta cu pa atende cu e problema di abuso di mucha y e abusadornan, Aruba mester percura cu tin hopi mas pa atende cu e fenomeno. Y no mester enfoca solamente riba hende homber, pasobra hende muhe tambe por ta abusado. Ni cuanto ley pasa, si no yega na e nucleo di e problema, den e hogar, e formacion den hende te na recuperacion di e culpabel, si no siña muchanan na scol ken no ta permiti pa yega na partinan intimo, no por elimina e problema di abuso di mucha, segun Ricardo Croes.

Parlamentario Independiente Daphne Lejuez tambe ta sostene e ley den su totalidad, pero ta ripiti e ponencia cu a bin hopi biaha dilanti. Esta, cu mester enfoca riba prevencion. “E meta ta pa reduci, elimina abuso di mucha. Esey ta e obhetivo principal.” Como tal, Lejuez ta urgi Gobierno pa fortifica e cadena completo cu ta encera prevencion, investigacion, y revalidacion tanto na e victima pero tambe e abusado.

Mike de Meza di fraccion di APV a pidi Minister di Husticia hunto cu Minister Presidente reuni cu Corte di Husticia y yega na palabracionnan concreto riba e forma con huesnan ta trata casonan. “E daño ta grandi. Mi ta para tras di e ley aki. Pero ni e ley existente cu ya caba ta duna castigo halto, ta keda aplica.” E pensamento aki ta comparti pa Edgar Vrolijk di MEP cu a hasta ilustra con hues a tene cuenta cu edad y salud di un welo pa reduci su castigo, a pesar cu a keda proba e abuso riba su nietonan. “Huez no a tene cuenta cu e daño cu e welo a haci na su nietonan.” Den su pensamento, e caso specifico aki ta ilustra cu hasta ora e cadena di investigacion cana bon, huesnan tambe por duna un resultado mediocre. “Ta p’esey tin protesta. Nos mester ta sincero den esey.” Locual Vrolijk ta duda sinembargo, si e registro di esnan condena di abuso di mucha mester ta publico. Esaki mirando e escala chikito di Aruba. Kizas e registro mester ta conoci pa polis. Vrolijk a enfatisa cu su argumento ta pa proteha privacidad di e victima tambe a lo largo.

Robert Candelaria, Alan Howell y Rocco Tjon, tur tres Parlamentario cu a bin di Cuerpo Policial tabatin e mesun preguntanan na Minister di Husticia, esta si Cuerpo Policial, particularmente Jeugd en Zeden Politie ta bay haya e experticio y ekipo necesario pa facilita y mehora e investigacion riba abuso, pa evita cu e victima mester keda ripiti su storia y asina fayonan ta keda registra. “Laga nos no bin cu expectativanan cu no ta realistico. Djis aumenta e castigo maximo ta trece expectativa cu despues ta resulta den mas desapunto,” Candelaria a bisa. Ex-Minister di Husticia y Parlamentario di AVP, Arthur Dowers kizas a bay mas directo. “Si hisa e castigo maximo te cu 15 aña di 12, e ta nifica en realidad cu kizas hues lo duna un aña adicional di castigo. Pasobra experiencia ta mustra cu hues ta duna maximalmente un tercera parti di e castigo maximo den su sentencia.” Dowers tampoco ta kere cu castigo minimo lo mehora e situacion, ya cu ningun caso ta igual. “Ministerio Publico e ora ta haya e tarea di ta hues.”

En general e discusion den Parlamento ayera tabata dirigi riba urgi pa no atende e problema di abuso di mucha solamente uzando e aparato hudicial, sino pa envolvi tur sector, haci uzo di tur tecnologia existente pa bringa e cancer aki cu ta afecta hopi famia.