Ex-minister plenipotenciario na Hulanda, Guillfred Besaril a haci fiesta cu credit card, y segun investigacion di Bon Dia Aruba, e tin hopi chens di sali ileso di e situacion aki, ya cu no ta bay persigui su persona penalmente.

Despues cu prome minister Evelyn Wever-Croes a haya un e-mail anonimo unda e no por a actua na e momento ey debi cu no tabatin hechonan concreto, despues el a haya un otro e-mail di ekipo di Arubahuis na Hulanda splicando cu nan tabatin sospecho fuerte cu ex-minister Guillfred Besaril conscientemente no tabata actua a base di ley di contabilidad.

Den esaki, no solamente el usa e credit card cu ta propiedad di pais Aruba, tambe el a huur un propiedad na Hulanda unda a drecha hardin y cura di e cas, a pone un sistema di alarma pa 10.900 euro y a haci reparacionnan den e mesun cas na un costo di 21.000 euro na aña 2020.

El a haci un biahe pa bin Aruba cu no a wordo aproba pa Conseho di Minister na december di 2020 unda el a paga na hotel Divi Village 1.300 euro, tambe su yiu cu a caba di nace a wordo beneficia cu placa di pueblo di Aruba ora el a drecha ful e camber di e integrante nobo di e famia, su casa tambe a biaha riba VIP business class na momento cu Aruba tabata pasando un mal momento debi na pandemia di Covid-19 unda mas di 4.000 hende a perde nan trabou y empleadonan publico mester a entrega 12.6% di nan salario pa yuda esunnan cu mas tabatin mester di dje, esaki ta algun ehemplo chikito di hopi gastonan cu ex-minister Besaril a haci segun e investigacion di Centrale Accountants Dienst (CAD) cu na opinion di pueblo, e ta un burla y un insulto pa loke ta trata integridad.

Segun informacion, Ministerio Publico no lo tuma e caso aki di ex-minister Besaril pa persigi’e penalmente pa motibo cu ya caba Gobierno di Aruba a yega na un areglo cu ex-minister pa paga e suma di loke supuestamente a bay fout, cu el a malversa.

Segun prome minister a informa Bon Dia Aruba “Centrale Accountants Dienst a splica varios suma el a paga caba.”

Investigacion di CAD

Tocante e investigacion riba ex-minister Besaril, Bon Dia Aruba no ta bay mucho profundo di loke e instancia aki a trece dilanti na Parlamento di Aruba. Mas bien riba e manera con Roland Pang R.A di CAD a informa e parlamentarionan y pueblo di Aruba con e investigacion a bay. Nan a investiga 18 luna so pa motibo di aplicacion di e banco ABN Ambro, algo cu a wordo cuestiona pa un parlamentario, riba e hecho cu nan no tabata warda informacion di e cuenta di banco of pakico no a pidi esey for di archivo.

Bon Dia Aruba como medio di comunicacion responsabel ta duna oportunidad na Sr. Pang pa sigui investiga y habri e caso pa presenta pruebanan nobo. E medio aki lo colabora y lo saca tur e transaccion mediante e solicitud di un LOB verzoek na Hulanda di e presunto corupcion di ex-minister Besaril. Segun informacion cu redactor ta dispone, a cuminsa na momento cu el a asumi e funcion di minister plenipotenciario pa prome biaha.

Bon Dia Aruba ta conta cu experiencia di solicitud di LOB verzoek na Hulanda unda a trece dilanti claridad den e caso di e periodista asesina Poentje Castro.