Conseho di Minister por kita e carteranan di Minister di Ordenanza Teritorial, Infrastructura y Medio Ambiente sin mas. Pa hopi hurista, incluso specialista den Constitucion, e contesta ta no. Pero den un declaracion ayera riba Facebook, Prome Minister Evelyn Wever Croes a bay ampliamente kico a conduci na e decision pa tuma encargo di e carteranan di Marisol Lopez Tromp, kende awor aki ta na Hulanda pa acompaña su yiu kende a bay studia.

E Minister ta insisti cu tanten cu Parlamento no kita e cartera di dje, e ta sigui cu su funcion.

Pero, Prome Minister a bisa cu el a busca conseho huridico pa un situacion cu ta totalmente fuera di lo normal. A presenta un situacion cu ta tranca gobernacion, y mester a busca un salida mas rapido posibel for di e problema. Esaki pendiente di e decision cu Parlamento lo mester tuma. “E ta un asunto cu Parlamento mester atende cune, y nos no sa den cuanto dia nan lo atende cu e (mocion pa retiro di Minister Lopez Tromp),” ta locual Prome Minister a skirbi.

Pero mirando cu Aruba ta den un crisis y ta den negociacion cu Hulanda, “pues nos mester ta 100 porciento, 24 ora pa dia, 7 dia pa siman disponibel pa atende cu e problema aki, y pa por tuma decision den interes di pais Aruba,” mester a tuma e paso. Pasobra un Gobierno cu tranca no por sigui negocia y tuma decisionnan.

A busca un salida temporal cu ta tene cuenta di interes di tur, incluso di Lopez Tromp cu ta keda Minister temporalmente, sin un cartera cu tarea specifico, y esaki ta pa duna Parlamento e tempo y espacio pa cana e procedura. “Esaki ta e unico forma constitucional cu por a logra pa no tranca Gobernacion. Y specialmente mirando cu esaki ta un asunto interno di un partido, den cual e actornan no por a demostra cu por pone interes personal un banda y interes general prome, ami mester a tuma e decision aki.” Segun Prome Minister, pa garantisa cu tur investigacion andando na e momentonan aki, tanto na Serlimar como DIP, lo continua sin resistencia, el a dicidi pa tuma e carteranan bou su encargo. “Mi ta garantisa cu lo tin investigacion profundo, tambe investigacion nobo den casonan cu pa un of otro motibo no por a cuminsa den ultimo temponan.”

Dicon tur esaki ta pasando?

Prome Minister a bisa di ta convenci cu Covid a bin pa purifica hopi cos. Cosnan cu hopi tempo tabata scondi, ta sali na cla awor. “Lamentablemente e ta un asunto interno (di POR) cu nos a pidi pa nan atende internamente, y nan no a logra. Mi ta lamenta tur esaki masha hopi mes, pa di prome, pasobra Minister Marisol Lopez Tromp a demostra den e lunanan cu e ta un

Minister cu dedicacion y pasion pa su trabou.”

Wever Croes a sigui bisa cu “e problema aki ta uno constitucional ya cu nos no conoce minister independiente. E no ta existi. Si POR no ta sostene un minister mas, Constitucionalmente bo no por haci mucho.”

Na e momentonan aki interes general ta exigi mas cu interes di partido, y pa yega na un acuerdo cu Hulanda lo mester di atencion di tur hende y unda integridad hunto cu interes general ta na prome luga. Prome Minister a enfatisa cu el a busca conseho di expertonan riba e tereno y ta a base di esaki a actua, pasobra e tabata e unico solucion pa garantisa cu trabou di Gobierno no ta pega.

Wever Croes a bisa di ta lamenta cu mester pasa den tur e experiencia aki, pa motibo di un conflicto interno pa cual no tabatin boluntad pa resolve.

Di otro banda, experto den Derecho Consitucional, dr. Ryçond do Nascimento a bisa Bon Dia Aruba cu e decision di nombramento di un Minister ta firma pa Gobernador y Minister President, basa riba articulo 11.7 inciso 2 di e Constitucion di Aruba. Den e sentido aki, drs. Marisol Lopez Tromp ta nombra como Minister di Ordenanza Teritorial, Infrastructura y Medio Ambiente. Pa motibo di e nombramento aki cu a sucede pa landsbesluit, y firma pa Gobernador, e ta e unico cu ta autorisa pa tuma decision riba e tereno di su cartera. Esaki ta basa riba e principio di specialidad. Conseho di Minister no por tuma un decision pa kita e autoridad aki. E por sucede unicamente pa medio di un decreto nacional of landsbesluit, unda ta duna e Minister su retiro y ta nombra otro persona na su luga. Den caso cu Minister Presidente basa riba e paso di Conseho di Minister ta tuma decision riba e area di Ordenanza Teritorial, Infrastructura y Medio Ambiente, anto esakinan ta tuma sin autoridad y consecuentemente por keda anula. “Si Prome Minister kier tuma e cartera, e mester entrega un concepto di ley cu ta toca e tema na Gobernador. Gobernador mester bay de acuerdo cu e paso aki si, y aki ta unda e tarea di funcion di garantia di Reino ta drenta den wega.” E funcion aki ta describi den articulo 43 lid 2 di Statuut di Reino Hulandes, den relacion cu articulonan 15 y 21 di Reglamento pa Gobernador di Aruba.

Gomez & Bikker

Otro hurista, abogado mr. Lincoln ‘Dello’ Gomez tambe a publica cu e LIM, esta e Landsbesluit Instelling Ministeries ta defini e Ministerionan cu Aruba conoce. Si un Gobierno nobo trece cambio den e Ministerionan, mester cambia e LIM, pa duna e Ministernan base legal pa actua. Tanten cu esey no sucede, e Minister menciona den e LIM ta keda cu su autoridad.

“Sin cambio di e ley aki, no por crea Ministerio nobo, no por tin Ministerio di ‘Fast Track’ of ‘Slow Track,’ ni tampoco Ministerio di ‘Asuntonan Placentero’ y asina mi por sigui,” Gomez a comenta. “Pero tampoco nos LIM conoce un Minister sin cartera. Por lo tanto, den mi parecer, e paso pa kita cartera di un Minister y duna otro, e carteranan ta carece di base legal. Si un Minister no por eherce su tarea pa motibo di ausencia of malesa, e tin un reemplasante cu tambe ta regla pa ley.” Den opinion di Dello Gomez, kende pa hopi aña tabata partner cu mr. Andin Bikker, actual Minister di Husticia, den e oficina di abogado Gomez & Bikker, “no por djis kita y parti un cartera di Minister sin un base legal. O sea, cu aprobacion di Parlamento y cu un decreto nacional firma pa Gobernador.” Specificamente, e ta encera cu ta defini un Ministerio basa riba un landsbesluit (decreto nacional, articulo 10, inciso 1) cu ta rekeri un firma di un of mas Minister y Gobernador. Sin e firma di Gobernador, no tin e decreto nacional aki. “E decision di Conseho di Minister no por reemplasa esaki, pasobra ley no ta duna espacio.” Ademas, pa e bira ley, e decreto nacional (landsbesluit) mester keda publica den Landscourant (Articulo 10, inciso 2), algo cu tampoco a sucede.

E LIM di 2018 ta bisa cu e Ministerio di Ordenanza Teritorial, Infrastructura y Medio Ambiente ta encarga cu desaroyo teritorial, infrastructura, maneho di terenonan y edificio di Gobierno, registro di datonan kadastraal, inspeccion di siguridad y tecnico, cas pa comunidad, recogemento y procesamento di desperdicio, medio ambiente y proteccion di naturalesa.

Parlamentarionan POR

Locual ta yamativo ta cu Wever Croes a considera e discordia den partido POR uno interno. E pregunta ta dicon e Parlamentarionan di POR, cu ta Dellanire Maduro y Alan Howell, no a entrega un mocion di desconfianza contra nan Minister, cu ta e herment legal cu nan tin. Bon Dia Aruba a tuma contacto cu ambos Parlamentario, cu a participa na e reunion di POR unda a dicidi cu no kier sigui traha cu Marisol Lopez Tromp. Te cu ciere di nos edicion, ningun di dos kier a duna declaracion Es mas, Howell a bisa cu e no por duna declaracion na prensa tanten cu e situacion “no ta mas cla pa mi. E ora lo mi duna un declaracion.”