Alexandra van Huffelen sa mas di oligarca Ruso cu tin avion registra na Aruba? Esaki ta un di e preguntanan cu Parlamentarionan di Tweede Kamer Ceder di ChristenUnie y Kuiken di PvdA a haci ayera na e Secretario di Estado pa Relacionnan di Reino basa riba reportahenan noticioso cu biyonarionan Ruso tin nan avion registra na Aruba. Nan kier sa si ta conoci e embergadura di tur propiedad di e biyonarionan Ruso den e parti Caribense den Reino.
Ceder y Kuiken kier si tin y con e coordinacion den Reino ta pa loke ta e sancionnan contra Rusia y individuonan Ruso den cuadro di e guera na Ukraina. “Ki papel articulo 3, inciso a di Statuut di Reino ta hunga un papel. E articulo ta mustra cu relacionnan exterior ta un responsabilidad di Reino Hulandes.”
E Parlamentarionan a puntra Van Huffelen si e ta dispuesto pa firmemente urgi Aruba pa den termino corto tuma accion contra e oligarcanan Ruso cu tin nan avionnan priva registra na Aruba y cu ta someti na sancion. Di e forma aki por anda mas efectivo cu e sancionnan aki den Reino.
Ceder y Kuiken ta puntra Alexandra van Huffelen si e sa mas di e registracion di avion den e otro paisnan Caribense di Reino Hulandes y si e ta dispuesto pa tuma e mesun accionnan na e paisnan ey, cu nan kier pa e tuma na Aruba.
Tambe kier sa con ta cu e registracion y presencia di bapornan den e paisnan Caribense di Reino. Y si esaki ta e caso, si e como Secretario di Estado, ta dispuesto pa tuma accionnan firme. Kuiken y Ceder kier contesta mas lihe posibel riba nan preguntanan.
