Den un carta fecha 29 di juli, parlamentario y lider di fraccion MAS, Marisol Tromp, hunto cu miembro di su fraccion, Aquannette Gunn y lider di fraccion ACCION 21, Miguel Mansur, a pidi na presidente di Parlamento di Aruba, Edgard Vrolijk, un reunion publico cu prome minister relaciona cu metemento politico di parti di e mandatario den Ministerio Publico.
E parlamentarionan ta haci peticion pa un reunion publico “cu caracter di urgencia”, despues cu reces di parlamento termina, cu prome minister Evelyn Wever-Croes tocante supuesto metemento politico di parti di e prome minister den Ministerio Publico (OM), un organo autonomo.
“Ta haci un apelacion na Minister President pa su persona presenta na Parlamento lo antes posibel, pa asina e responsabilisa su mes na Parlamento den un reunion publico cu lo tin como punto di agenda: Metemento politico directo door di Minister President den Ministerio Publico como organo autonomo, cual ta linea recta contra nos sistema di Trias Politica,” e carta ta indica.
Den conexion cu e peticion aki, parlamentario y lider di ACCION 21 Miguel Mansur, a publica riba su plataforma social un comentario tocante e motibo pakico e parlamentarionan ta haci peticion pa e reunion publico aki cu urgencia.
“Democracia ta depende riba separacion di poder, institutonan confiabel y eleccionnan liber. Nunca mester asumi cu nos libertad ta garantisa, mester keda atento contra esnan cu kier viola separacion di poder y/of haci nos institutonan mas fragil,” el a indica.
El a agrega: “Tur hende mester carga nan castigo pa viola nos leynan pero nunca por acepta cu politiconan ta purba usa nos sistema hudicial como un arma contra contrincante. Nos a mira MEP purba konkel votamento pa prohibi pasada di un ley, konkel procedura pa baha un minister cu unicamente 10 miembro presente den parlamento y awor nos a mira evidencia di metemento politico den ministerio publico. Pa garantisa libertad di nos tur mester para firme contra e abusonan di poder aki y esnan cu actua contra nos democracia mester wordo teni responsabel.”
Esaki no ta e prome acusacion di metemento politico den Ministerio Publico. Recientemente politico y ex-minister Otmar Oduber tambe a acusa Ministerio Publico di metemento politico y corupcion.
Oduber, cu aworaki ta lider di Plataforma Pais, a trece dilanti durante un conferencia di prensa recientemente e topico di metemento politico den Ministerio Publico y corupcion den e organo autonomo aki.
E politico a indica cu politica ta meti diki diki den Ministerio Publico y awe e ta mas convenci cu nunca cu Ministerio Publico ta wordo maneha politicamente y cu organo ta presta su mes pa corupcion.
Oduber a expresa cu Ministerio Publico ta permiti manipulacion di prueba, cu nan ta conspira pa perhudica ciudadanonan cu e meta pa scapa nan cara, sin laga afo e aspecto discriminatorio di e entidad aki unda ta permiti Hulandesnan Europeo bin Aruba y ta mal usa localnan den Landsrecherche.
Relaciona specificamente na e investigacion di caso Flamingo, caso den cual e ta e sospechoso principal, el a menciona cu di e 3 persona di Landsrecherche cu a pidi pa wordo scucha – dos Arubiano y un Hulandes – Landrecherche a bisa cu un di e dos Arubiano, e persona cu a traha e 7 rapport falso, a fayece y naturalmente no por wordo scucha; e otro no ta importa pa laga su identidad bira conoci; pero esun Hulandes Europeo a pidi pa no laga su identidad bira conoci.
Segun Oduber, e persona aki ta esun cu a bisa cu e 7 rapport falso ta confiabel y di e forma aki a malogra bida di Otmar Oduber ya caba pa 5 aña.
Durante e conferencia di prensa, Oduber a mustra prensa un carta di Procurador General dirigi na cabes di Gobierno di Aruba den cual e ta informa riba con e casonan ta andando. Segun Oduber, ta parce cu gobierno ta pidi pa dun’e material pa persigui director- y ministernan.
El a presenta otro carta caminda PG (anterior) lo a pidi pa no schors un persona debi cu e ta cooperando hopi bon den e caso Flamingo y su cooperacion ta necesario ainda. Es decir, hende no a wordo geschors pasobra Ministerio Publico a bisa DRH, gobierno y ministernan pa no haci esaki ya cu e ta dunando informacion riba Oduber, y cu despues lo regel e situacion di e persona aki, riba cual tabatin investigacion.
Ya varios biaha Oduber ta denuncia diferente aspecto di caso Flamingo. Caso Flamingo a cuminsa pa motibo di e acusacionnan a bin door di un proces verbal crea pa BCI, Bureau Criminele Inteligentie di Polis. Na april di aña pasa, Oduber a entama un caso contra Ministerio Publico, RST y KPA. Esaki pa motibo cu, segun Oduber a splica, desde cu investigacion den caso Flamingo a caba, OM – of den e caso aki, Procurador General – no a tuma un decision den e caso. Ademas, november ultimo el a entrega un keho adicional relaciona cu e ocho acusacion inicial cu a duna inicio na Caso Flamingo.
E tempo ey caba, Oduber a trece dilanti e critica contra tres funcionario; un ta e hefe encarga cu Departamento di BCI den Cuerpo Policial di Aruba, otro ta un miembro di Landsrecherche y e ultimo ta un miembro di RST, manera Bon Dia Aruba a publica e tempo ey.
No ta conoci si e peticion pa reunion publico urgente di parlamentarionan Mansur, Tromp y Gunn ta relaciona cu e acusacionnan di Oduber tocante metemento politico den Ministerio Publico.
Segun informacion, tanto presidente di parlamento y prome minister ta cu vakantie den exterior y no ta conoci si nan ta na altura of si a mira e documento pidiendo un reunion cu caracter di urgencia den parlamento na unda e parlamentarionan ta spera cu prome minister lo rindi cuenta tocante supuesto metemento politico directo di su parti den Ministerio Publico.
