Parlamentarionan di Aruba kier ayudo di coleganan Hulandes pa convence Hulanda cu corta 60 miyon den cuido ta un sla mucho pisa

Delegacion di Parlamento di Aruba ta conta riba nan coleganan di Hulanda pa bay haci pregunta na Gobierno di Reino y particularmente Secretario di Estado Demisionario Raymond Knops riba e decision pa instrui Aruba corta 60 miyon florin den gasto di AZV.

Esaki ta locual Parlamentario di MEP, miembro di delegacion di Parlamento di Aruba na e Consulta Interparlamentario di Reino Hulandes, IPKO a bisa.

Manera ta conoci, e recorte di 60 miyon florin na AZV ta un di e condicionnan pa Aruba a ricibi sosten di likides for di Hulanda. E suma tabata basa riba recomendacion di College Aruba Financieel Toezicht, CAft.

Jan Paternotte di D66, kende tabata Presidente di IPKO pero alabes ta encabesa e Comision Asuntonan di Reino den Tweede Kamer di Hulanda a bisa cu Aruba a mustra cu e ta mira e decision di CAft pa corta 60 miyon den AZV, “como un medida hopi pisa y nan ta dispuesto pa bin cu ahuste, pero den otro forma, unda parti chikito lo sali for di e sector di cuido.”

E delegacion di Hulanda a bisa durante e reunionnan di IPKO na Boneiro cu mester wak pa alternativanan cu por logra den un tempo defini. Den otro palabra e suma final di ahuste of cortamento di gasto pa Pais Aruba mester ta igual manera determina, segun e acuerdo cera cu Gobierno di Hulanda. A palabra durante IPKO cu Aruba ta bay manda e proposicion cu a yega na dje cu tur e sector na e Comision Permanente di Tweede Kamer, y cu e delegacionnan di e paisnan ta comparti esaki cu otro. “Por ehempel, ta pasa hopi biaha cu ta haci peticion na Gobierno di Reino pero Tweede ni Eerste Kamer di Parlamento Hulandes ta na altura mes cu a haci peticionnan. E lo ta bon pa nos comisionnan di Tweede y Eerste Kamer ta na altura di tur cos. E lo yuda,” Paternotte a bisa. Y esaki ta e palabracion cu a haci.

E parlamentarionan Hulandes por tabatin comprension pa e posicion di Aruba. Pero e pregunta ta si e sentimento aki, di coleganan Hulandes berdad lo por tin efecto riba e decision di Conseho di Minister di Reino.

Rocco Tjon a bisa na Boneiro cu e tin tur confianza cu su coleganan di Hulanda lo por yuda Aruba y p’esey mes a palabra cu den futuro, ora ta trata sosten na otro y peticion di ayudo lo informa otro.

Durante e sesionnan di grupo, a hasta papia cu kizas mester pensa riba otro trayectoria. “Cu Aruba mester ahusta gasto, nos ta consciente di esey,” Tjon a bisa. “Aruba a cuminza cu baha gasto den cuido. Pero nos punto di bista semper tabata cu e mester sosode na un forma responsabel. Pues nos lo manda tur documento na nos coleganan di Tweede Kamer, documentonan manera e cartanan manda pa Conseho di Minister di Reino y tambe Secretario di Estado Knops, unda ta pidi pa un argumentacion debido di e motibo pakico mester corta 60 miyon den cuido.” E documentonan ta mustra tambe cuanto a corta caba.

“Si tur hende lesa e datonan obhetivo aki, cu a keda presenta pa e sector di cuido mes y ta analisa esakinan, y ta mira cu tin disponibilidad na Aruba pa baha gasto, mi ta kere cu lo tin comprension y oido for di nos coleganan. Esey mi ta convenci.”

Y aunke Conseho di Minister di Reino ta dicidi, e Plataforma di e Interparlamentario Overleg Reino Hulandes t’ey pa un motibo, segun Tjon. “Si nos coleganan por intercambia pensamento, ta keda na e Parlamentarionan Hulandes e ora, pa haci e preguntanan na nan Secretario di Estado,” Tjon a conclui.