Parlamentarionan contento y honra pa sirbi na bienestar di pueblo di Aruba

Ayera mainta despues di ceremonia di huramentacion di constelacion number 12 di Parlamento di Aruba, parlamentario a combersa cu diferente medio di comunicacion pa asina duna nan prome declaracionnan como miembronan di e constelacion nobo di Parlamento di Aruba.

Parlamentario di fraccion AVP Wendrick Cicilia a expresa cu e ocasion ta un ocasion special p’e personalmente. El a indica cu el a cana un caminda hopi largo y den su caso ya e tabatin e oportunidad di por a traha den parlamento e ultimo tres aña como consehero legal y asina e por sigui proceso-, debate- y desaroyonan politico hopi di cerca, pero su influencia tabata hopi limita.

“Awe mi por bisa cu mi tin un influencia grandi riba e maneho di pais Aruba como parlamentario representante di comunidad di Aruba. E ta un honor grandi pa mi, e ta un honor grandi pa mi famia. E sosten a cu nos a haya nos ta asumi cu hopi responsabilidad,” el a remarca.

Cicilia a enfatisa cu ta importante pa comunidad di Aruba realisa cu no obstante su edad hoben, e no tin miedo di responsabilidadnan grandi. El a sigura cu e ta dispone di e capacidad y tin amor y pasion pa su pais.

“Esaki nos ta bay demostra y desplega den nos trabou como representante di pais Aruba. Nos tur tin un meta comun cual ta mehora e experiencia di bida, e experiencia comercial, e oportunidadnan pa nos pais Aruba por sigui progresa y desaroya,” el a subraya.

Pa loke ta e trabounan den parlamento, el a indica cu pa funcionamento di parlamento ta importante pa parlamentarionan realisa kico ta nan trabounan y instrumentonan. El a señala cu a hopi aña a experiencia cu parlamentarionan no ta utilisa nan instrumentonan cu nan tin pa influencia e direccion di e pais.

El a splica cu den proceso di campaña AVP a identifica hopi dolor den comunidad y un di esunnan mas grandi ta cu e hendenan hopi biaha no ta biba den libertad economico y ta pasa den hopi dificultad financiero.

Cicilia a resalta cu como pais Aruba tin hopi reto grandi, por ehempel kico ta bay haci e sector turistico, con ta bay diversifica economia, e aspecto di relacionnan den Reino y con ta bay sigui dilanti cu e relacion financiero cu Hulanda y e Rijkswet cu mester atende cune.

“E retonan cu nos pais tin ta hopi grandi y mi ta kere cu e combinacion cu bo ta wak awe di experiencia pero tambe di entrada di sanger y mentenan nobo den parlamento ta elementonan hopi importante pa Aruba cu awor si Aruba por conoce un desaroyo distinto,” el a subraya.

Parlamentario di partido Futuro, Gino Goeloe tambe a expresa cu e ta sinti hopi emocion y ta un paso grandi p’e. El a splica cu pa mi yega te unda el a yega aworaki e mester a pensa hopi y e decision tabata uno hopi grandi pa tuma.

“Bo ta bin di un carera den e parti medico, den e parti di Wit Gele Kruis pa 22 aña y pa bay cambia… pero mi a bisa mi ta haci’e pa bienestar general di comunidad y pueblo pasobra ta juist esey a duna mi e empuhe pa bay den politica,” el a indica.

El a sigui splica cu el mira cu e adultonan mayor no ta haya e cuido debido, cu e baby- y muchanan tambe mester di mas cuido, y como tambe e mayornan. “Eynan e dolor ta y eynan mi a bisa cu mi tin cu bay haci cambio y ora bo kier haci cambio na e manera ey bo tin cu bay un stap mas halto y esey ta bin di bay den politica y bira parlamentario y por ta kizas minister,” el a resalta.

Pa loke ta e trabou den parlamento y puntonan di prioridad, el a indica cu e puntonan cu semper Futuro a papia di dje cu tin prioridad tabata e parti financiero di Aruba y relacion cu Hulanda, tambe e puntonan manera, entre otro, e parti di cuido di adultonan mayor, cuido di muchanan, e parti medico y e parti di wachtlijst cu ta demasiado largo. Tambe, el a sigui menciona, mester duna educacion mas atencion, specialmente na e docentenan di scol cu pa añas ta bringando pa un mehoracion den e parti di salario, y tambe e parti di husticia cu mester duna mas tempo na e aspecto aki.

Otro parlamentario nobo cu a huramenta ta Clifford Heyliger di partido AVP. Di su banda el a expresa cu e ta yen di alegria pasobra ta un honor, no djis pasobra ta trata di parlamento, pero e ta un honor pasobra e ta sirbiendo comunidad. “Bo tin un rol di sirbidor na un pueblo, esey ta e honor mas grandi cu bo por tin como trabou,” el a destaca.

Pa loke ta e puntonan importante di partido AVP el a indica cu e 10 punto di campaña di partido AVP ta keda importante. El a señala cu tin necesidad bou di e grandinan cu ta biba un situacion hopi fastioso. Tambe esnan di menos recurso caminda tin hende cu mester traha dos of tres trabou pa sobrevivi.

“Esey no ta e bida cu nos ta aspira na Aruba. Si un hende tin cu traha dos of tres trabou e ora algo ta robes cu e sistema y nos tin cu bay drecha e sistema,” el a subraya.

Heyliger a remarca cu tin cosnan cu mester haci den termino cortico y tin cosnan na termino largo. El a enfatisa cu mester ataca e cosnan cu ta urgente awo y planea pa e termino largo y sigura cu e situacionnan no ta ripiti mas.

Prome minister demisionario Evelyn Wever-Croes a huramenta como parlamentario y desde ayera e ta eherciendo dos rol, esun di parlamentario y prome minister demisionario, te ora cu formacion di un gabinete nobo di gobierno finalisa.

El a splica cu tin hopi trabou pa haci ya cu aña a habri y tur e proyectonan pendiente tin cu continua.

“Ta hopi druk y principalmente door cu tin espacio financiero tin hopi proyecto cu ya caba a ser entama. Esey ta tuma su tempo, pero nos ta haciendo. Entrante awe a huramenta como parlamentario y esey tambe ta bin cu su responsabildadnan,” el a resalta.

El a indica cu tin un parlamento cu hopi conocemento y cu hopi experiencia. El a remarca cu fraccion di MEP ta bay haci un tremendo trabou y sea ta den e rol di coalicion of rol di oposicion, nan ta cla pa ehecuta e trabou.

Por ultimo, na parlamentarionan nobo cu a huramenta pa prome biaha el a desea nan hopi exito, sabiduria y iluminacion. El a expresa cu e trabou no ta facil pero no imposibel si nan tin nan curason na e bon luga y nan ta prepara. “E ta un trabou cu bo tin cu prepara, bo tin cu lesa bo stuknan, mester puntra, mester atende e reunionnan di comision pa sa kico ta pasando etc. E ta un bunita trabou cu bo por sirbi pueblo di Aruba,” el a agrega.

Otoro parlamentario nobo y cu hopi wowo riba dje ta parlamentario Stephany Sevinger di AVP, yiu di ex-parlamentario Benny Sevinger. El a expresa cu ta hopi contento y orguyoso di a ricibi e confiansa di e votadornan pa representa nan den Parlamento di Aruba. “Mi ta sinti cu mi bay haci un trabou cu hopi amor, pasenshi, humildad, eficiencia pa honra cada un di e votonan cu a ser deposita en mi,” el a expresa.

El a agrega ademas cu e ta hopi contento tambe di mira cu un biaha mas su fam ta den parlamento. El a remarca cu e legado di su tata no ta caba na momento cu el a dispidi di e constelacion di parlamento 11, si no cu e ta continua den su persona.

Tocante su trabou den parlamento y kico lo haci diferente, el a splica no por indica ainda kico lo por ta diferente pasobra el a ser lanta cu e mesun norma y balornan cu su tata y pues ta bay traha mesun duru y cu e mesun humildad cu su tata.

El a agrega cu un diferencia ta cu e temponan aworaki ta mas moderno y luchanan ta diferente, pues eventualmente e ta spera di tin su propio marca den parlamento. “Pero cu mi lo hib’e dilanti cu e mesun humildad y eficiencia y trabou cu mi tata a haci’e? Mi ta spera pasobra e ta un gran politico, mi ta admir’e hopi y mi ta spera mi por carga su nomber cu hopi orguyo,” el a enfatisa.