Parlamentario di AVP y ex- Halto Inspector, Robert Candelaria, a manda un mensahe di felicitacion na nos cuerpo policial.“Un dia hopi special y cu sigur ta trece hopi recuerdo inolvidabel y emocional na cualkier un di nos cu a forma parti di Cuerpo Polical Aruba”, Candelaria a bisa durante e ceremonia di huramentacion y entrega di diploma na Scol pa Polis.
E ta un dia cu ta pone tur para keto y realisa cu e soño di bira Polis a bira un hecho!
Robert Candelaria, den combersacion cu varios agente nobo, a duna algun conseho riba locual cu nan por spera den e trayectorio nobo aki. Banda di un pabien bon mereci, el a corda nan cu ta drenta un trabou, cu ta un di esunnan di mas dushi cu por eherce, pero na mes momento un trabou cu hopi reto, cu lo exigi hopi di bo, cu hopi presion di tur sentido, pero cu lo keda na Bo pa scoge locual ta corecto y keda corda e motibo pakico bo a scoge e carera aki.
“E escogencia pa bira Polis ta uno cu bo ta haci pasobra bo stima bo pais, bo kier sirbi bo pais y cu esaki bo ta pone bo mes na disponibilidad pa proteha bo pais” ta locual Candelaria a bisa. Mensahe cu sigur e por mira den cara di cada un di nan cu awe a huramenta a keda capta y cu a scucha su palabranan di conseho, naturalmente ta algo cu tin cu keda corda nan pa asina tur dia di nobo nan keda cu e mesun animo y motivacion pa sali y sirbi comunidad.
Awe 5 klas sea a celebra / huramenta / ricibi diploma of cu ta trahando caba y cu ta haya certificadonan di opleiding nobo cu nan a sigui. Ta na su luga pa duna nan e atencion pasobra esakinan ta momentonan, cu di experiencia Robert Candelaria ta remarca, bo no lo lubida nunca mas. Na momento cu ta para dilanti superiornan, dilanti Minister y ta hura / priminti di cumpli cu e leynan y sirbi bo pais.
Candelaria tambe a menciona e vision di un estadista den feliz memoria, Watty Vos, cu ideanan di e tempo aya por mira awe un scol cu ta draai y por mira cuanto Polis el a produci na e instituto aki. Un instituto cu merece renobacion y hopi mas inversion pa por hiba nos na e siguiente fase den desaroyo di educacion di Polisnan. Candelaria ta contento cu keto bay por mira hopi di e Docentenan cu el a conoce como Polis riba caya of den diferente departamento, awe ta resalta den nan uniform como docente, pasando nan experiencia y conocemento over na e aspirantenan.
Pa finalisa, Candelaria a felicita su ex coleganan pa un bunita ceremonia. Palabra di pabien na cada un, pabien na Cuerpo Policial, deseando nan hopi exito pasobra Aruba mester di nan!
