Parlamentario di Fraccion MEP, Edgard Vrolijk recientemente a manda un carta pa minister di Desaroyo Teritorial, Infrastructura y Medio Ambiente cu recien a asumi su cargo, Marisol Lopez-Tromp, solicitando un vragenuur ‘mas pronto cu ta posibel’ riba e topico Parkietenbos, alavez presentando un cantidad di pregunta riba e topico.
Cu fecha 3 di februari ultimo, e carta di Vrolijk ta solicita pa Lopez-Tromp atende e asunto di Parkietenbos, Ser’i Teishi y Serlimar. Tambe e ta inclui 18 pregunta al caso, for di kico ta e plan di maneho pa Parkietenbos te cu futuro di e compania Ecogas.
“Kico ta bay haci cu e firmanan colecta recientemente?”, Vrolijk ta puntra refiriendo (por asumi; red.) na e 710 firma cu Stichting Parkietenbos a colecta recientemente contra contaminacion den nan bario. Den nan peticion, e stichting aki ta exigi gobierno atencion inmediato pa resolve contaminacion di Ser’i Teishi, specificamente mencionando e kimamento di sushi na dump di Parkietenbos. Vrolijk kier pa Lopez-Tromp detaya e plan concreto pa aborda e kimamento en cuestion.
Ademas, Vrolijk ta puntra specificamente si lo continua cu e mesun maneho di minister anterior – Otmar Oduber kende a retira na fin di aña pasa pa motibo di salud, entre otro – of lo bin cu un maneho nobo.
Otro pregunta cu sigur lo ta den mente di hopi persona den comunidad ta tocante e companianan Ecogas y Serlimar. “Con a para cu e acuerdo entre Serlimar y Ecogas?” E pregunta aki ta un di varios relaciona cu e tema en cuestion. Ademas ta cuestiona e situacion financiero di Serlimar, si lo bin cu algun cambio den maneho pa haci operacion di Serlimar mas eficiente, y si tin un plan pa mitiga e gastonan di e compania pa reduci su efecto negativo riba caha di gobierno. Esaki den cuadro di e situacion financiero dificil di gobierno, unda rebaho di gasto ta keda un asunto clave.
Mientras tanto, Lopez-Tromp no a haci mencion ainda di e tema di Parkietenbos, Ser’i Teishi y Serlimar. Den su prome conferencia di prensa como minister, el a referi unicamente na desaroyo teritorial den e contexto di desaroyo economico y proteccion di naturalesa; di esaki el a bisa cu lo continua cu e maneho di minister anterior.
