Recientemente Parlamentario di Fraccion MEP den Parlamento di Aruba, Arthur Vallejo, durante conferencia di prensa a urgi Minister di Salubridad Publico, Dangui Oduber, pa convoca un di tres partido evaluado, completamente separa, pa asina evalua e calidad di e proyecto y si e ta digno pa acepta.

Ta parse manera cu ta 100 aña atras e proyecto di renobacion y expansion di Dr. Horacio Oduber Hospital (HOH) a cuminsa y ainda e no tin fecha concreto pa keda cla. Recientemente a sali na cla cu e contratista cu tabata encarga cu e proyecto, a bandona esaki y ainda e proyecto no por finalisa.

Parlamentario di Fraccion MEP den Parlamento di Aruba, Arthur Vallejo, a elabora riba e topico aki durante un conferencia di prensa na unda el a indica cu en berdad e contratista a bandona e proyecto y cu esaki encera un cantidad astronomico cu pueblo di Aruba mester bay paga, p e proyecto aki.

“E cantidad di placa cu pueblo di Aruba ta bay paga pa un renobacion di un mega hospital pa e proximo 29 añanan pueblo di Aruba mester bay paga e proyecto aki y cu e interes di financiamentonan sigur cada un di nos aki na Aruba lo mester bay paga cerca di 1 biyon florin pa e proyecto aki. Esaki ta doloroso pasobra sigur pa e placa aki, pueblo di Aruba por a laga traha dos hospital completamente nobo cu tur ekipo aden,” el a expresa. .

El a indica cu e proyecto a ser ehecuta pa e “boefnan di mas grandi cu e pais aki a conoce”, pasobra e fracaso y complicacion di con e proyecto aki ta hinca den otro, y tur loke a sucede den e transcurso, ta tipico di personanan cu un mentalidad cu definitivamente no tabatin e interes di pueblo na prome luga.

Vallejo a remarca cu ta parce cu placa semper tabata na prome luga pa e proyecto aki, enbes di e bienestar di pueblo, y esaki tabata desde e comienso di e proyecto cu e otorgamento y proceso di destaho ya cu, segun el a indica, tabatin un grupo cu mas experiencia y menos costo cu por a realisa e proyecto, pero toch a scoge uno sin experiencia y mas costoso.

“Esaki ta pasado cu ta importante pa recorda pueblo, pero tambe ta importante kico mester haci pa cu e futuro y con nos por bay proteha pueblo di Aruba di un di e catastrofenan mas grandi den e sector salud den e historia di Aruba,” Vallejo a bisa.

E Parlamentario di Fraccion di MEP a splica cu segun el a scucha, e proyecto aki mester a wordo entrega na final di e aña aki, pero cu aworaki kisas mester alarga esaki pa e proximo aña. Su conseho pa ora cu nan yama e minister pa ricibi e “famoso yabi y saca potret sigur”, pa e no haci esaki sin prome evalua y verifica e calidad di e proyecto.

“Mi ta kere cu pa respet pa pueblo ta importante pa warda un rato prome pasobra prome cu esaki mester haci algo hopi importante prome. Loke mi ta conseha Minister di Salubridad haci ta cu mester wordo haci den prome instancia, incluso mi lo cuminsa busca di awor caba, fondo pa un tercer partido evaluado,” el a enfatisa.

E partido evaluado aki cu Vallejo ta recomenda ta uno cu no tin nada di haber cu ningun di e stakeholders cu a haci e proyecto aki, cu lo evalua e condicion di e edificionan y cu despues di evaluacion lo informa den un rapport si di berdad e materialnan y construccion ta bay wanta y dura un tempo rasonabel.

El a subraya cu tur esaki den interes di pueblo, di interes nacional pasobra el a y ta sigui scucha diariamente con dak ta cay den otro, con tin problema cu inundacion pasobra tubo ta rementa, con vloernan di OK cu no ta nivela y mashinnan no ta stabiel pa mesun motibo, holo di diesel y un sin fin di otro cosnan cu mester drecha.

“Ta den interes nacional pa bin cu un grupo evaluado pa keur y duna conseho si esaki ta un proyecto digno di acepta. Esaki ta algo cu mi ta sinti cu Minister di Salud no por faya pueblo di Aruba den esaki, pasobra e lo ta supremamente doloroso pa scucha cu den 10 aña of menos, lo mester bolbe renoba di nobo pasobra materialnan no ta wanta of ta deteriora di tal manera cu e lo bay cuesta pueblo di Aruba pagado di belasting miyones atrobe,” Vallejo a agrega.

Na mesun momento el a subraya cu pa e motibo ey mes tabata importante e mocion pa no fuciona ImSan y HOH, pero mas bien pa nan traha cu otro den un protocol di cooperacion cu otro, pa e motibo di caos y falta di orden di parti di HOH y demas stakeholders den e proyecto aki.

“E esfuerso haci den Imsan cu awe nos ta wak un Imsan cu gana pa crece y ofrece pais Aruba un cuido di salud di calidad, no por wordo stroba di crece,” el a declara.

E Parlamentario a sigui splica cu den e programa di partido MEP, sigur den Gabinete Wever Croes I, den cual el a actua como consehero di gobernacion, y e vision di Minister di Salud ta cu ImSan mester sigui crece den tur sentido, specialmente aworaki cu ta premira problemanan den HOH.

Di su banda el conseha Gobierno di Aruba pa sigui pusha pa ImSan haya mas capacidad y ofrece e servicio necesario. “ImSan ta nos salba bida y si bo wak e den e aspecto aki nos mester pone manos a la obra pa interes general di nos poblacion un biaha mas.”

Mester menciona cu e proyecto di renobacion y expansion di Dr. Horacio Oduber Hospital a wordo inicia durante Gabinete Mike Eman. Minister Dangui Oduber a indica ya caba na 2021 den declaracionnan haci na Bon Dia Aruba cu e proyecto aki no mester a dura asina largo y no mester a costa asina hopi. Un aspecto cu tabatin di haber cu e hecho cu inicialmente e salanan di operacion no a ser inclui den e costo di e proyecto.