Durante su prome bishita di trabao na Aruba, Secretario di Estado di Relacionnan den Reino y Digitalisacion Zsolt Szabó a reuni cu e parlamentarionan cu ta miembro di e Comision di Relacionnan den Reino. Parlamentario y lider di fraccion MAS, Marisol Tromp, tambe ta forma parti di e comision aki y a publica riba su pagina di Facebook tocante e encuentro aki.
Parlamentario Tromp, hunto cu presidente di parlamento y demas parlamentarionan cu ta miembro di e Comision di Relacionnan den Reino a reuni a ayera mainta cu e Secretario di Estado nobo. Tromp a indica den su publicacion cu durante e encuentro aki el a trece dilanti algun punto di preocupacion.
Ademas di esaki, el a splica, cu ayera mainta tambe el a manda pidi minister di Finanzas, Xiomara Maduro, si e por duna un relato detaya por escrito tur luna na parlamento tocante e proceso cu nan ta hibando pa finalisa e Rijkswet di supervision financiero, basa riba preocupacionnan cu e parlamentario y su fraccion tin.
Den e documento cu e parlamentario a dirigi na minister Maduro, e ta indica cu a base di e bishita di e Secretario di Estado na Parlamento di Aruba e ta haci e peticion na e minister.
Primeramente e ta puntra e minister di e por entrega mensualmente un relato/rapport detaya di e situacion di e contenido di e concepto di e Rijkswet di supervision financiero.
Tromp ta señala tambe ci e Secretario di Estado a indica cu e kier mira resultadonan di termino largo pa loke ta gobernacion, finanzas solido y un economia duradero. Den esaki e parlamentario pa puntra minister Maduro con gobierno lo cumpli cu e exigencia di e Secretario di Estado.
Ademas di reuni cu miembronan di Parlamento, Secretario di Estado Szabó a reuni tambe cu, su excelencia Gobernador di Aruba, Alfonso Boekhoudt, cu prome minister Evelyn Wever-Croes y Conseho di Minister.
Mediante un comunicado di prensa, prome minister a indica cu e reunionnan bay hopi bon y cu a haci palabracionnan di con lo traha y comunica cu otro den futuro. Ademas, e Secretario di Estado a ricibi un presentacion di e progreso di e Landspakket. Mas detaye di e encuentronan no a wordo divulga.
Aruba ta e prome isla riba agenda di e Secretario di Estado Szabó. Durante su estadia na Aruba e Secretario di Estado lo pasa bishita KIA y Archivo Nacional Aruba tambe, e lo realisa un recorido den San Nicolas y e ta bay tin un encuentro cu representantenan di sector empresarial.
Despues di su bishita na Aruba, e Secretario di Estado lo bishita Corsou y Boneiro prome cu regresa Hulanda.
