Parlamentario Tromp-Lee preocupa cu decision di Triple A: Awe sindicatonan lo ricibi bista mas concreto di plan di reorganisacion

Parlamentario Shailiny Tromp-Lee a expresa su preocupacion na Bon Dia Aruba riba e situacion di instabilidad laboral cu e trahadonan di aeropuerto ta pasando aden actualmente debi na e plan di reorganisacion cu gerencia di Aruba Airport Authority (Triple A) kier ehecuta.

Diaranson ultimo nan a convoca ambos sindicato FTA y STA pa participa den un reunion publico na Parlamento. Sinembargo ta existi un discrepancia entre e dos sindicatonan cu ta representa e trahadonan di aeropuerto. Pues den e reunion a participa FTA, y despues nan a reuni como fraccion di MEP cu STA so. Esaki pa medio di iniciativa di nan lider di fraccion, parlamentario Rocco Tjon.

Segun parlamentario Tromp-Lee e sindicatonan a splica ampliamente riba ki fase di negociacion nan ta cu Triple A na e momento aki. Tambe e sindicatonan a informa Parlamento riba nan preocupacion y cu nan ta trahado pa yega na un pakete husto. E parlamentario en cuestion a bisa cu – segun informacion cu e sindicato FTA a duna – e pakete cu tin riba mesa, nan no ta contento cune ainda.

Tambe a base di preguntanan cu parlamentarionan a haci na FTA, e sindicato no a ricibi e plan di reorganisacion di parti di Triple A, pero si nan a haya e plan social. E parlamentario a compronde cu eventualmente awe 20 di october, of no mas tarda cu diabierna awor, e sindicatonan lo ta ricibiendo un bista mas concreto di e plan di reorganisacion, caminda e sindicatonan lo haya e structura di e organisacion nobo. Entre nan lo haya sa kendenan ta esunnan cu lo bay ricibi pakete den e segundo fase di retiro. Y tambe cual vacatura aparentemente lo keda crea door di e reorganisacion aki.

Den su posicion como parlamentario, Tromp-Lee a informa cu el a yega di sinta den dos reunion cu Triple A. Pero e mes no a keda convenci riba urgencia di bin na e momento aki cu un plan di reorganisacion.

E mes como parlamentario no a ricibi e plan di reorganisacion pa e mira su contenido. Nan a reuni como fraccion di MEP cu sindicato STA, caminda nan a duna informacion similar. “Den sentido cu nan tampoco tin e plan di reorganisacion. Nan tambe tin accesibilidad na e plan social,” asina parlamentario Tromp-Lee a declara na e matutino aki.

Segun e parlamentario, STA tampoco por duna den concreto cuanto hende Triple A lo ofrece pakete di retiro. Tampoco nan no tin un bista riba structura nobo y tampoco di e vacatura cu ta bay bini.

Pero el a bisa cu despues di mira na juni e rapport anual di Triple A entrega na Parlamento, e parlamentario ta haya cu e cifranan financiero ta mustra cu nan ta un compania ‘hopi sano.’ Un compania cu e ultimo cinco aña a conoce un resultado netto di un promedio di 26.8 miyon. Pues nan ta spera cu e compania aki tin un rosea financiero mas amplio.

Preocupacion

El a bisa cu su preocupacion ta varios. Pero esun mas grandi ta toch cu Triple A ta un compania estatal. Un compania cu pa parlamentario Tromp-Lee, mester sigui e linea di maneho di gobierno. Den e caso aki gobierno a yega di manda instruccion, tanto 18 di augustus como dia 12 di october, caminda den ambos carta gobierno ta urgi Triple A pa para e negociacion cu sindicato y tambe e parti di e plan di reorganisacion.

E parlamentario a bisa cu e ta preocupa, ya cu no obstante di e dos carta aki di gobierno, Triple A ta sigui cu su plan. Mientras gobierno ta e unico accionista. El a cita cu e mesun statuut di Triple A, articulo 10 ta bisa claramente, cu nan mester tene debidamente cuenta cu instruccionnan di e accionista. Pero den e caso aki niun di e dos carta cu gobierno a manda pa Triple A, no ta hayando oido.

Tambe el a refleha su preocupacion explicitamente pa e mesun trahadonan cu lo haya pakete di retiro. Un di nan ta cu nos mester ta consciente cu awor nos tin subsidio di salario y FASE, pero e yudansa aki keto bay lo bira menos. Con e trahadonan por mantene nan mes ora cu no tin entrada? Tambe otro preocupacion cu e parlamentario di fraccion di MEP tin ta relaciona cu e trahadonan di e otro companianan estatal, ya cu lamentablemente mas compania lo bay yega na e situacion cu a presenta na aeropuerto.

E preocupacion actual ta cu e trahado por haya un pakete di retiro. Pero si e no ta maneha e placa debidamente, y no ta haya un trabao cu ta dificil den e situacion cu nos ta pasando aden, tur e placa cu e por a haya den un tempo cortico por disparce. Ademas si e trahado tin 45 aña bay ariba e opcion pa haya trabao ta bira ainda mas dificil. E parlamentario a bisa cu aeropuerto como compania estatal, e lo prefera pa gerencia di Triple A haci mas sondeo riba cortamento di gasto a base di retira trahadonan.

El a haya cu sindicato tambe tin un responsabilidad. El a bin cu un pregunta na STA durante e encuentro cu nan a tene cu su dirigentenan. Esta si nan ta dispuesto pa evalua si e trahadonan lo bay di acuerdo pa sacrifica cierto beneficio secundario pa garantisa mas cupo di trabao awor cu nan ta bay cuminsa contrato colectivo (CAO) nobo cu Triple A.

Igualmente otro pregunta cu a surgi tabata, si e sindicatonan ta haya cu e plan di reorganisacion aki tabata necesario. Ta asina cu for di e presentacion cu e sindicatonan a haya di Triple A, sindicato ta saca e conclusion cu esaki ta asina.

Parlamentario Tromp-Lee kier keda convenci na e momento aki cu en berdad e situacion financiero di Triple A ta asina alarmante cu ta hustifica un medida di retira personal memey di un pandemia. Considerando tambe cu gobierno no ta honra niun peticion di retiro.

E kier ta convenci, ya cu na e momento aki gobierno ta duna subsidio di salario cu e meta di mantene mas tanto trahado posibel na pia di trabao y cu un entrada. Pues si e meta ta esey, parlamentario Tromp-Lee no ta compronde con un compania estatal ta bay haci contrario na loke ta e meta di subsidio di salario.

E ta compronde cu nos ta pasando un prueba dificil debi na e consecuencianan cu e crisis di Covid a trece cune, pero e mensahe den e caso aki ta cu nan ta urgi pa tur compania por a cremencha pa wanta hendenan na pia di trabao.

Pero ora cu un compania estatal ta haci lo contrario, y ta sigui informa cu lo continua retira hende, y si nan no logra e retiro boluntario, nan ta bay hues, esaki ta lamentabel pe. “Esey mi ta haya mas devastador ainda,” el a bisa. Si nan ta tolera cu un compania estatal haci esaki, parlamentario Tromp-Lee ta haya cu e ta bira un señal di luz berde pa sector priva lo por haci mesun cos.