ORANJESTAD – Un proyecto cu ex- minister Ramon Lee a bin cune pa duna reconocimento na e baluartenan di diferente bario cu a traha riba tereno cultural, a keda bandona pa varios aña durante e gobierno anterior. Awor parlamentario Shailiny Tromp-Lee kier rescata e proyecto aki, cu su tata a laga atras.
El a expresa su satisfaccion na Bon Dia Aruba cu gobierno, pa medio di minister di cultura, Xiomara Ruiz-Maduro, a bin cu e iniciativa bek den su maneho, pa duna reconocimento na esunnan cu ta aporta grandemente na nos desaroyo cultura. Pero primordialmente ariba boluntarismo, y e ta kere cu e proyecto Reconoce Bo Bario ta pas cu e maneho aki tambe.
P’esey e ta haci un apelacion na gobierno pa den cuadro di e tipo di reconocimento aki, pa tene cuenta cu e proyecto cu ex- minister di cultura Ramon Lee a bin cune, esta Reconoce Bo Bario. E tempo aya, den cada districto el a pone un monumento. Un muraya cu tabata aloca plakkaatnan di reconocimento. “E ta un manera cu ta lanta orguyo den bario”, Tromp-Lee a bisa. Ainda algun di e murayanan aki a logra sobrevivi for di abandono y negligencia.
Segun e parlamentario, e proceso di seleccion di e baluartenan tabata uno transparente. Ademas pueblo mes por a sugeri e posibel nominadonan. E ta kere cu den e direccion ey nos tin cu bay bek atrobe. E ta kere cu ta necesario pa pone, ya sea un bes of dos bes pa aña, e personanan cu a aporta grandemente ariba e tereno aki. Ya cu e ta un forma pa incentiva e hobennan cu nan tambe por aporta na e desaroyo di nan pais. Tambe inculca cerca nan cu trabou boluntario ta algo necesario, segun e parlamentario.
