Parlamentario Tjon ta trece claridad riba situacion cu su prome yiu

Parlamentario y lider di fraccion di MEP, Rocco Tjon a referi brevemente riba e veredicto cu hues a duna den un caso sumario cu el a entabla contra parlamentario di oposicion, Benny Sevinger.

Ya caba via su colega di fraccion, parlamentario Endy Croes, pero tambe pa medio di un comunicado cu e mes a manda pa prensa – y cu Bon Dia Aruba a publica diasabra 22 di februari (pagina A22) – Tjon a bay mas den detaye riba e sentencia. Tambe el a manda un copia completa di dje pa prensa, cu e matutino aki a publica ariba su website.

El a contesta pregunta formula pa Bon Dia Aruba si den su sentencia hues a prohibi Tjon di tene contacto directamente cu su propio yiu pa bienestar di e mesun menor di edad. El a aclaria y tambe a cita for di e vonnis e decision cu hues a duna riba e asunto aki.

Tjon a bisa brevemente cu no ta asina. Ya cu den e mesun sentencia ta wordo splica claramente e motibo dicon esey a tuma luga. El a splica cu e motibo tin di haci basicamente cu su persona y su relacion cu e mama di su prome yiu ta di tal forma cu nan no por tin contacto. “Bo por les’e esey den tur sentencia,” el a bisa.