Diamars atardi, minister di Husticia Andin Bikker a tene un conferencia di prensa hunto cu parlamentario Rocco Tjon, Alan Howell y Hendrik Tevreden na unda nan a haci entrega di un proyecto di ley di iniciativa na e minister, pa asina contribui cu algun solucion den caso cu ta considera importante. E proyecto di ley por haya tratamento den parlamento proximamente.

Minister Bikker a recorda cu tempo cu su persona tabata den parlamento el a haci uso amplio di derecho di enmienda y a traha leynan di iniciativa. El a señala cu e ta contento cu tres parlamentario a presenta un ley di iniciativa cu ta den e cuadro di busca solucion pa e reto cu e pais ta enfrentando.

Rocco Tjon, lider di fraccion di partido MEP a pidi minister Bikker pa percura pa ehecuta e mocion cu parlamento a presenta y cu ta significa un paso importante den eleva producto, den caso aki den trabao di polis.

Pa loke ta trata e proyecto di ley cu nan a entrega na minister Bikker, Tjon a manifesta cu e ta contene un serie di documento, conseho di Raad van Advies tambe y e preguntanan cu a wordo haci pa tur miembro di parlamento, y nan contesta.

E ley ta introduci mas instrumento legal pa polis por haci un trabao mas completo den identifica un persona, cu pa algun motibo nan kier para y averigua ken e persona ta, a base di un obligacion pa tur ciudadano desde edad di 14 aña, cu semper lo mester tin un identificacion valido cune y presenta esaki na prome peticion.

Tjon a comenta cu nan a haya importante pa duna minister e proyecto, mirando e hecho cu e ley aki, yama oficialmente Ontwerplandsverordening Identificatieplicht tin hopi implicacion practico tambe pa oficialnan di investigacion y oficialnan di investigacion special. E detayenan di esaki, kico si por y kico no por den e proceso di confronta un persona, lo keda reglamenta den un decreto nacional contene medida general.

Tambe, el a aclarea cu hopi di e preguntanan cu a wordo haci, tambe pa e miembronan di parlamento, ta dirigi na e minister pa motibo cu hopi di nan tin di haci cu con den practica cierto aspectonan di rekeri e ciudadano presenta e identificacion, lo bay keda regla a base di e ley. Lo purba di trata e ley ainda e luna aki, mirando cu tur documento ta cla. Tjon a comenta cu nan a haya tambe cooperacion di ministerio di Husticia pa yega na e producto final.