E siman aki y no pa promer biaha, e fenomeno di un parlamentario cu ta conta ta ki plan e partido tin, mientras e ministro(nan) responsable ta keto. E parlamentario di e partido menor den e coalicion ta bin conta kico nan tin pensa pa bay haci riba tereno di energia renovable, specificamente cu tecnologia di hidrogeno. Tur cos masha bunita, pero despues di e debacle di LNG unda e fraccion a keda revela como ‘cacho sin diente’, vocifera cu e partido ta bay haci algo cu hidrogeno, riba su mes un tema interesante, no ta parce asina relevante.

Tur hende por sa cu tanten e partido lider den e coalicion no cuminza trece dilanti o apoya plan serio pa energia renovable, esaki no ta nada mas cu propaganda barata, sin ningun perspectiva di realisacion. Y di esey, di un maneho coherente encuanto nos futuro den energia, francamente nos no a mira nada ainda.

Esey no solamente pa e seis luna di gobernacion nobo, pasobra den e cuatro añanan anterior tampoco a sucede algo riba e tereno aki, aunke e posibilidad tabat’ey. Tabatin iniciativa di origen Hulandes pa cuminza cu un proyecto di hidrogeno riba tereno di e refineria, como reemplazo pa e refineria tambe. Y aki ta unda tur proyecto, prometedor o no, ta dal para pasobra e partido grandi ta keda biba cu e ilusion di habri e refineria y pa esey ta pone tur otro iniciativa un banda. E luna aki por cierto ta celebra e di 10 aniversario di clausura di e refineria, hunto cu e refineria grandi di St Croix. Hunto nan ta testigo cu refinacion di petroleo no tin futuro mas den Caribe, pero falta pa convence e sabionan di e dos partidonan grandi cu nan soñonan color de rosa ta strobando nos pais pa bay dilanti.

E anuncio aki di parti di e partido junior di e coalicion encuanto hidrogeno ta pone nos corda e morto prematuro cu e proyecto di cannabis, impulsa pa otro partido junior den e anterior coalicion, a haya aunke e condicionnan tabata un poco diferente. No tabata trata solamente di un rancamento di ciboyo entre e partidonan den e coalicion anterior, sino tambe di factornan obhetivo cu tabata dicta desde un inicio e fracaso cu nos por a contempla despues. Ta realmente increible con por a crea tanto scuma sin chuculati, proyectando ganashi gordo pa gobierno den forma di diferente impuesto cu produccion di cannabis. Y esey den un negoshi unda tabata pretende cu Aruba lo tabata un ‘frontrunner’ den Caribe, mientras cu tur hende cu lo tabatin deseo di pone nan mes na altura di e situacion regional, lo tabata por a sa cu nos tabata mas bien e ‘Johnny come lately’ patetico den e asunto aki. Ademas cu e problemanan internacional di transferencia di fondo originando di e negoshi aki lo a duna problema cu no lo tabatin solucion. Cu desaparicion di e partido chikito den e anterior coalicion, e soño – o pesadiya – di cannabis a desaparece. Na modo di bisa, ni holor no a keda…

E mesun rumbo por ta e destino di e proyecto di LNG tambe. Por wel di a firma contrato, pero esey no ta cambia nada den e situacion obhetivo di LNG den nos region, unda atrobe nos ta e ‘Johnny come lately’. Tin por lo menos cinco outlet grandi di LNG den Caribe. Niun hende no ta wardando ansiosamente riba un siguiente bendedor di gas natural den e region; hasta Corsou a scoge pa LPG (Liquified Petroleum Gas), despues di a studia e alternativanan cu cierto cautela. Si benta desde Aruba di gas natural na cliente externo no tuma lugar, tur e gastonan di infrastructura ta bin cay riba e consumidor local, pueblo pues. E propio parlamentario cu a bin cu e anuncio di hidrogeno, ta medio sugeri cu LNG talvez no ta bay logra. Nos lo haya sa na su debido tiempo.

Sin embargo, en principio nos no ta negativo tocante e posibilidadnan di hidrogeno, den un set up adecua di diferente fuente di energia. Ta asina ta usando hidrogeno caba den exterior, unda ta usa energia electrico di origen solar o di biento pa produci y almacena hidrogeno, y usa esaki sucesivamente pa reemplaza, o como backup pa otro fuente di energia. Mester ta mas cu claro cu no por pretende cu uso di hidrogeno ta un metodo di oro cu ta resolve tur problema. E ta requeri cu cualkier pais cu ta desea di haci uso di e tecnologia aki, mester tin un plan strategico coherente di desaroyo di energia, algo cu nos no a mira den hopi aña. Y ta logico cu un plan asina no por bin di un parlamentario, pa bon intencion cu e por tin. E mero hecho cu e plan ta surgi di e manera aki ta indica cu no tin apoyo garantiza ainda di gobierno completo, pero cu ‘den banda’ un parlamentario ta haya luz berde (of geel!?) pa bisa algo al respecto, pa calma e ola di critica cu e partido junior a haya despues di nan posicion reciente den e debate tocante LNG. Realidad sin embargo no a cambia, y esey ta cu ta e partner senior ta defini kico ta sucede. Y tanten interes di e famia gobernante ta ilusiona cu refineria, no lo tin cambio tampoco.