ORANJESTAD – Parlamentario Sue-Ann Ras ta subraya cu den e gobernacion anterior tabatin un racha di traha of manda traha documento y proyecto, pero lamentablemente e supuesto bon documento- of proyectonan aki, di cual tabata costa pueblo hopi placa, no tabata mira luz di dia. E suceso lamentabel di agresion contra un docente, sigur ta pone tur hende para keto y analisa kico tur a haci y mester haci ainda, pa evita otro incidente asina of kisas pio. 

Dos documento cuestionabel
Un di e tantisimo preocupacionnan di Parlamentario Ras den enseñansa tabata netamente e aspecto di siguridad na scol.

Biniendo di veld, uno por duna testimonio di hopi incidente y realidad ta, cu cada scol y directiva ta anda cu su proceduranan. Pa bay bek den pasado pa sa kico a haci caba, Ras ta elabora lo siguiente. Na 2011 un comision consisti di SKOA, KPA, Ministerio Publico, Fundacion Comunidad y Criminalidad (SMC), Fundacion Telefoon pa Hubentud hunto cu Departamento di Enseñansa (DEA) a firma un protocol pa logra e meta di introduci e metodo: Traha na un Scol Safe. Na mei 2015 e minister di enseñansa anterior, a reactiva e proyecto aki y supuestamente a cuminsa cu un plataforma y tabatin un persona encarga cu esaki na DEA. Na 2016 finalmente a lansa e manual: Guia pa un Scol Safe. Banda di esaki tambe tin e documento: Gedragscode, cu ta delinea e palabracionnan riba e puntonan general di salida y riba e areanan di atencion, manera: mal uzo di poder, intimidacion sexual, maltrato fisico y spiritual, discriminacion, racismo, tentamento, conocemento di media y privacidad.

E documentonan mester ta parti di e maneho cu tur directiva, docente, studiante, mayor, assistent, personal mester sa di dje y tin bon conocemento, pa defini un bon clima na scol. “Loke mas ta asombra ami ta, cu na momento cu ma lesa e dos documentonan: Gedragscode y Veiligheid op School, unda cu un di stakeholdernan, esta SIMAR, a forma parti di dje y tin e funcion di salvaguardia interes di su miembronan trahado, a keda sin agrega y percura pa pone tambe e aspecto di siguridad pa nos maestronan. Ami mes cu tabata miembro y docente, ta sinti mi decepciona y disgusta cu e realidad aki”, Ras a bisa disgusta.

Proceso awor
E Comision di Maestro Preocupa a expresa nan puntonan cardinal tocante e situacion di violencia contra maestro y tambe a presenta algun sugerencia di solucion riba termino cortico y largo. Ta turno awor pa nan dialoga cu e Minister di Enseñansa en cuestion y asina forma un comision pa ehecuta e trabounan inmediato y bin cu solucion mas pronto cu ta posibel y nan por conta cu sosten completo di parlamentario Ras.

Ras ta admira e determinacion y forma profesional cu e comision a tuma y sigur ta un ehempel pa yega na dialogo productivo pa soluciona problema y tin un “draagvlak” amplio. Ya e grupo a reuni tambe cu SIMAR y e resultado e biaha aki ta mustra di ta positivo. Tambe nan lo sinta cu minister Andin Bikker, pa asina presenta nan preocupacion y solucion y finalmente pa gobierno ehecuta sea protocol of maneho pa e situacion aki. “E agresionnan sea verbal of fisico di mayor como tambe alumno na docente mester haya atencion y solucion inmediato.

Recomendabel ta pa analisa algun protocol den exterior riba e topico aki. Por ehempel na Buenos Aires, Argentina, tin un ley desde 2017, unda ta duna multa y hasta aresta mayor cu agredi verbal of fisicamente e docentenan of personal di docente di scol publico of priva. Ta papia di un sancion te hasta 60 dia di aresto of te 30 mil pesos di boet, cu ta ekivalente na alrededor di 700 dollar Mericano. Un plan di conscientisacion ta na su luga, pero mester cuminsa pensa tambe den direccion di ley y/of protocol riba un nivel nacional” Ras a finalisa bisando.