ORANJESTAD – Diadomingo ultimo, Parlamentario Sue-Ann Ras a pasa un dia completo na IMC Weekendschool na De Mussen, Hoefkade na Den Haag, unda ta forma e brug entre e hobennan (10-14 aña) cu comunidad. 

Manera nos sa, enseñansa regular ta dirigi pa adkiri diploma, pero weekendschool ta percura pa motivacion ta central y e enseñansa cu e alumnonan ta haya eynan ta conecta cu motivacion natural di e muchanan pa descubri mundo. “Na weekendschool e muchanan no ta djis siña pa futuro, sino nan ta siña kico futuro realmente ta nifica”, parlamentario Sue-Ann Ras a cuminsa na comparti.

IMC Weekendschool
E weekendschool ta pa tur hoben entre 10-14 aña di tur nivel di scol y e alumnonan mes ta dicidi si nan kier forma parti di e programa aki. IMC Weekendschool tin 10 establecimento na Hulanda, 3 ‘zusterscholen’ na Brussel, un departamento di Research & Development, cu ta traha den colaboracion cu e universidadnan e metodonan y investigacion efectivo, un netwerk di alumno IMC Alumni, unda e ex alumnonan ta sigui haya guia y na nan turno ta brinda guia na e generacionnan nobo.

Experiencia na De Mussen
For di 9:30 di mainta riba diadomingo, ya e docente- y guianan ta presente pa repasa e ultimo detaye- y palabracionnan prome cu e actividadnan cuminsa. Segun Ras: “Na momento bo drenta bo ta sinti un ambiente y energia positivo y dinamismo, ya cu mayoria di e guia- y docentenan ta bin boluntariamente pa duna nan les of actividad. Nan ta enfoca riba 3 meta concreto: 1. Siña conoce bo sociedad y amplia e perspectivanan pa futuro. 2. Siña conoce bo mes y experimenta cu e  interesnan y desaroya e habilidadnan di bida. 3. Pone nan mes den e sociedad, door di experimenta cu e rolnan social y reflexiona riba kico kiermen ta un bon ciudadano.”

Les di filosofia
E alumnonan a haya oportunidad di haya conocemento di filosofia, kico un filosofo ta haci y pakico, con nan ta siña formula pregunta cu ta encera rasonamento y no djis contesta, haya sa e diferencia entre duna opinion y discuti, siña scucha otro y dialoga cu otro. Nan ta haya les di “gastdocenten”, unda ta enfoca riba diferente tarea interactivo pa e alumnonan y e resultado di participacion tabata tremendo. E alumnonan tabata haya oportunidad pa vocifera nan conocemento di e topico. “E 4 oranan cu nan ta pasa na scol ta di sumo importancia pa nan desaroyo personal. Y sin duda ora dos ex alumno a bin conta nan experiencia, ora nan tabata bishita weekendschool y ki impacto esaki tabatin riba nan bida, ta impresionante. Ta di aprecia y balora, con nan ta conta cu mas di 4 mil boluntario, no ta haya subsidio di gobierno, pero tur nan entrada ta di sponsor personal y hopi compania, cu ta traha a base di responsabilidad social y corporativo. Un proyecto cu sigur mi lo por wak un futuro na Aruba tambe,” Ras a finalisa bisando.