Recientemente Augeo Foundation (Hulanda) y UNICEF tabata na Aruba pa sinta cu e stakeholdernan principal, pa loke ta trata implementacion di meldcode y parlamentario Sue-Ann Ras, cu tambe a entrega algun cambio riba e ley articulo 243 di e Codigo Civil, relaciona cu meldcode y meldpunt.

“Manera ta conoci caba, UNICEF ta brindando apoyo tecnico pa diferente aspecto di e Crisis Plan Social, specialmente riba e aspecto di abuso di menor. Esaki ta un tremendo iniciativa y logro di minister Glenbert Croes, den cuadro di Sociaal Crisis Plan, mirando cu un di e metanan final di e plan aki ta, pa nos salvaguardia y sigura proteccion di nos muchanan awor y den futuro”, Parlamentario Sue-Ann Ras a cuminsa na bisa.

Rol di Bureau Sostenemi
Segun Ras dia 1 di juni 2019 Bureau Sostenemi a keda apunta como e punto central di registracion (meldpunt), unda cu nan lo tin e tarea y autoridad legal pa fungi como punto central pa conseho, sosten, registracion di tur caso y preocupacion cu ta relaciona cu abuso y negligencia di mucha. E tareanan di Bureau Sostenemi como e punto central di registracion, stipula den articulo 243 di Codigo Civil ta:

1. Duna conseho na profesional y ciudadano, cu tin preocupacion tocante un menor, specialmente riba kico ta e pasonan cu nan por tuma.

2. Investiga e casonan pa clarifica si tin un forma di abuso ta tumando luga.

3. Defini e pasonan cu lo mester tuma luga.

4. Informa e instancianan concerni.

5. Fungi como punto di registracion di tur caso/preocupacion di abuso y/of negligencia di

Menor na Aruba, unda tur instancia mester registra.

6. Informa e persona/instancia cu a meld e preocupacion y kico ta e pasonan cu lo tuma.

Cu Bureau Sostenemi tin un lista di espera pa atende, no ta un secreto. Pero na mes momento ta bon pa aclaria cu Bureau Sostenemi tabata funciona solamente cu 3 trahado social. Ta desde 15 di september 2018 cu Bureau Sostenemi a haya 3 trahado mas, cu a pasa den un ‘inwerkingfase’ di dos luna y for di december/januari 2019 ta trahando completo pa atende e casonan di lista di espera como tambe e casonan nobo cu ta drentando.

“Ta bon pa aclaria tambe, cu e casonan cu ta meld desde 2015 ta subiendo y aña 2018 t’esun di mas halto. Ta comproba tambe na Hulanda, cu na momento cu bin cu conscientisacion, meldcode y meldpunt, e meldingnan lo sigui subi y hasta por duplica y mester tin e profesionalnan bon entrena pa ehecuta e casonan mas lihe y eficiente posibel”, Ras a sigui elabora.

Meldcode
Meldcode ta un plan di pasonan con pa actua, ora un instancia haya señal di abuso of negligencia di menor.

Pero den un meldcode ta stipula tambe e.o. kico ta e autorisacionnan di e profesionalnan, kico ta e pasonan concreto cu mester tuma, pa e profesionalnan por haci un consideracion cuidadoso si e ta meld na Bureau Sostenemi of no. SegunRas: “Incluso na Hulanda a sali di un investigacion cu e profesionalnan cu tabata uza un meldcode, tabata meld 3 biaha mas hopi, compara cu e profesionalnan cu no tabata uza un meldcode.”

Articulo243d ta duna e Conseho di Minister e autoridad, pa obliga e instancianan pa traha y implementa un meldcode y Minister di Asunto Social ta esun encarga pa stipula e condicionnan, kico exactamente mester cumpli cune den un meldcode. Pues e meldcode manera na Hulanda, ta enfatisa hopi riba e pasonan cu e instancianan mes por tuma, prome cu tuma e decision pa referi e caso na e meldpunt. ‘Bureau Sostenemi hunto cu otro stakeholders mester crea awor diferente protocolnan y acuerdonan pa colabora, unda lo stipula kico ta e pasonan cu e instancia mes lo tuma y na ki momento lo acerca of meld na Bureau Sostenemi’, Ras a amplia.

Finalmente e implementacion di e meldcode como tambe e cambionan di e ley cu Ras a entrega, ta un paso grandi pa loke ta trata accion contra abuso di menor. Como parlamentario nos ta encarga tambe pa bin cu ley of haci cambio den ley y esaki sigur ta un ley cu merece di haya tur vigilancia necesario, p’e ta bon implementa y p’e no bira un ley mas, cu ta keda djis riba papel.

Mi kier enfatisa tambe cu den articulo 243c e profesionalnan cu tin un deber pa mantene detayenan di nan practica profesional secreto ta haya un base legal pa contesta preguntanan di Bureau Sostenemi y mester duna informacion relaciona cu e meldingnan cu a entrega y si e mucha ta den peliger. E meldcode aki no lo stop abuso di mucha, pero si e ta duna nos e hermentnan clave, pa combati y preveni mas abuso tuma luga,’ Ras a finalisa bisando.