Durante rueda di Prensa di Dialuna ultimo, Parlamentario pa Partido MEP, sr. Guillfred Besaril a elabora primeramente riba e disgustonan cu e Ley di Parkeermeters a trece cune pa esnan den Caya Betico Croes y vecindario. Segundo Parlamentario Besaril a elabora riba e problemanan operacional cu e clientenan di AruParking ta encontra cune diariamente. Sr. Besaril a declara lo siguiente:
“Nos Fraccion a wordo acerca recientemente pa diferente cliente di AruParking cu ta Masha disgusta cu e servicio cu e compania ta duna. Un di e disgustonan di mas grandi ta na e momento cu tin problema tecnico y Parkeermeternan bay for di servicio. E problema tecnico aki ta causa cu e pagonan haci pa e parkeervak na e mashin no ta of no por wordo registra door di parkeerwachternan. Esaki ta trece cune cu e autonan di e clientenan cu a cumpli cabalmente cu e pago necesario ta wordo geklem. Pa colmo na ora di yama AruParking nan no por wordo atendi na e sitio y tin di bai te na e oficina den Wilhelminastraat.
Un otro disgusto cu hopi ta reclama tanto cerca nos como riba social media, ta e fenomeno di klem vehiculo prome cu e duracion cual e clientenan a paga p’e caduca! Pues ta hisa pone klem riba e auto, mientras cu ainda e tempo paga no a pasa. Por ultimo ta forma di atende cu publico di parti di algun parkeerwachters. E forma con ta atende cu cliente na momento cu tin diferencia di opinion, disgusto of hasta rabia, ta lagando hopi di desea. Trata cu hende rabia of disgusta no ta un materia facil. Polis por ehempel ta sigui un preparacion extenso pa por labora bou di presion y asina mes e trabou conoce su momentonan. Den pasado nos Fraccion a yega di adverti cu un luna so di preparacion ta mucho poco pa un trabou mane esun di un parkeerwachter.
Nos Fraccion ta na altura cu AruParking y e Ley di Parkeermeter no ta leu di ta e exito premira pa esnan cu bin cune! Pueblo no ta di acuerdo cu e Ley, comercio ta sinti su efecto y e problemanan operacional cu mi ta menciona ta sigui pone presion enorme ribs AruParking como compania. Si for di awor caba ta confronta tur sorto di problema, ta kico ta e destino di Aruparking di es forma ‘ki? Corda cu riu no te keda core!” E Parlamentario a termina bisando.
