Gabinete Eman no tabata transparente y Parlamento no por a ehecuta su poder di autorisacion y su tarea di control

Dia 23 di september 2020 a continua cu un reunion hopi importante caminda a trata e rapport ‘BO Aruba’ di Algemene Rekenkamer. Dia 27 di januari di e aña aki Fraccion di MEP a entrega e peticion na Presidente di Parlamento pa yama un reunion publico pa nos atende e 4 rapportnan presenta pa Algemene Rekenkamer ultimo 2 añanan, esta: Bo Aruba presenta na januari 2018 Focus onderzoek: Zicht op subsidie presenta na october 2019

Publiek Private Samenwerking cu ta trata Green Corridor y Watty Vos Blvd. presenta na november 2019 y Focus onderzoek: oorzaken overwerk uit perspectief van KPA, KIA en CEA tambe presenta na november 2019.

Pakico ta importante pa trata e rapportnan?

Na prome luga e motibo principal ta cu nan ta presenta e.o. resultado di investigacion con Gobierno, den e caso aki Gabinete Mike Eman, a atende cu placa di pueblo, of miho bisa a malgasta y en deuda irresponsablemente nos pueblo.

Na di dos luga ta importante pa a base di e conclusionnan presenta y e embergadura y consecuencia financiero ocasiona awor y pa den futuro, mas pronto posibel nos entama e proceso pa responsabilisa esunnan responsabel pa e sumanan cuantioso cu no por wordo responsabilisa segun e rapport Bo Aruba.

Por ultimo y sigur no menos importante nos mester siña di erornan di pasado. Den e rapportnan ta keda subraya e echo cu e informacion manda pa Parlamento, pa loke ta trata e diferente proyectonan investiga, tabata insuficiente pa Parlamento por ehecuta su poder di autorisacion y su tarea di control.

Pueblo mester realisa cu ta trata di inversionnan di un total di 1600 miyon florin. Proyectonan cu a expone pais Aruba na hopi riesgo, cu no a keda cubri responsabelmente y caminda cu ARA a conclui cu tabatin hopi error a keda constata. Proyectonan caminda hopi fil e ta incompleto y sigur e parti mas crucial ta cu Gobierno di Mike Eman no a bisa con Pueblo lo bay paganan. En berdad den pasado AVP a menciona introduccion di un ABB cual ta un algemenebestedingsbelasting pero nunca a introduci esaki. Mas cu claro esaki ta subraya e falta di responsabilidad di Gabinete Mike Eman cu no a percura pa tin e saco di placa pa Aruba por cumpli cu e pagonan mara na e MEGA DEBE cu nan a crea pa nos, nos yiunan y nan yiunan. Si nos coy e proyectonan PPP so, Aruba lo caba di paga esakinan te dia cu mi persona cumpli70 aña. Adicionalmente ta bon pa indica cu nos ta paga mas pa e proyectonan cu berdaderamente nan ta bal.

Dia 13 di december di aña pasa mi persona a dirigi 24 pregunta na Minister di Finanzas y Minister di Infrastructura caminda un di mi en foke tabata con Gobierno ta bay percura pa cumpli cu e recomendacionnan di ARA pa no solamente raporta riba e progreso di proyectonan, pero tambe riba e maneho, gastonan, cobertura financiero y e riesgonan financiero a corto plaso y riba termino largo. Sigur como Parlamentario mi ta di opinion cu e rapportnan integral aki mester bira accesibel pa Parlamento mas pronto posibel. Como Parlamentario mi tabata kier sa di Gobierno con nos ta bay concretisa e recomendacion haci door di ARA den e rapport BO ARUBA.

Dia 27 di januari di e aña aki mi a ricibi contestacion riba mi preguntanan. Gobierno a contesta cu e recomendacionnan di ARA lo keda uza como punto di salida pa ministerie le y ambtelijkeafstemming. Tambe Gobierno a informa cu un proposicion pa trece mehoracion den e dunamento di informacion di Gobierno na Parlamento encuanto e proyectonan aki lo por tapa agrega den e uitvoerings rapportage desaroyo di e proyectonan PPP. No solamente cifra pero tambe maneho. Y mi tin cu bisa cu e proposicion a bira realidad pasobra den capitulo 7 di e uitvoerings rapportage di Gobierno esaki a keda incorpora.

Ademas Gobierno ta trahando riba ‘uitgebreide reguliereintegrale rapportages’en cuanto di e proyectonan PPP y esakinan lo bay keda manda pa parlamento.

 

Nos no por drecha mas loke a bay robes, pero si tin den nos man pa percura pa preveni cu e mesun erornan di Gabinete Mike Eman I y II ta keda cometi den futuro. Erornan cu a demostra di tin consecuencianan drastico pa nos pais y nos hendenan y pa hopi aña. P’esey mes ta hopi importante pa Parlamento conhuntamente cu Gobierno sigui traha riba e recomendacionnan di ARA pa asina nos por percura pa en berdad nos por cumpli cu nos trabou y representa pueblo dignamente. P’esey mes Fraccion di MEP a presenta 2 mocion pa urgi Gobierno pa traha riba concretisacion di esaki y alabes pa haci e investigacion necesario pa por responsabilisa esunnan responsabel pa e sumanan cuantioso cu no por wordo responsabilisa manera menciona den e rapport.