Parlamentario Shailiny Tromp-Lee ta enfatisa con contento e ta cu parti di un proyecto cu el a presenta na Minister Dangui Oduber y ex minister Otmar Oduber a bira realidad.
Segun Tromp-Lee ya a duna atencion parcialmente na e molester di stof door di e desaroyo turistico pa loke ta trata diferente ‘tour styles’ di awendia manera UTV’s y Off Road tours. A pone piedranan grandi pa preveni pasada rond di e misa, a basha asfalt pa minimalisa e molester di stof y e efecto riba e mantencion y cuido di nos Kapel.
A percura pa renobacion y modernisacion di e postenan di oracion.
Structura e infrastructura rond Kapel di Alto Vista
Parlamentario Tromp-Lee ta indica cu falta awor e parti di structuracion di e infrastructura rond y dilanti e kapel. Y sigur e parti mas esencial, cual ta pa bin cu un maneho pa por garantisa cu nos Kapel di Alto Vista ta keda un luga caminda nos por resa trankil y haya pas interno. Un maneho cu mester percura cu Kapel ta keda un luga caminda semper respet ta keda demostra (vestuario, comportacion y actitud) y cu na tur momento ta salvaguardia e motibo pakico e Kapel ta asina importante pa mayoria di nos hendenan.
Den palabra di Tromp-Lee: ‘Cu e ta un luga turistico, ta berdad, pero na prome luga e Kapel ta un luga di oracion y pa hopi un luga unda nan ta bay pa haya trankilidad, pas interno y por resa y gradici Mama Maria y nos dushi Niño Hesus’.
Tromp-Lee ta finalisa dunando danki di curason na tur a haci esaki posible. Tromp-Lee a reuni cu nan tur, plantia e proyecto y e ta indica cu hunto nan ta logrando pa salvaguardia nos Kapel di Alto Vista. Nos no ta cla ainda, pero nos lo sigui traha riba dje.
