Parlamentario Shailiny Tromp-Lee ta aplaudi e decision di Minister Glenbert Croes cu un biaha mas ta aproba extra beneficionan pa yuda mayornan riba Asistencia Social cu gastonan di scol.
Dunando contenido real na e derecho universal di tur mucha ariba enseñansa, Minister Glenbert Croes a aproba e suma di Afl 220,-adicional pa mucha te na un maximo di Afl 800 pa famia. E suma aki ta pa yuda cubri gastonan manera articulonan pa scol, uniform etc.
Ademas, pa percura pa ningun mucha keda atras, e mandatario a aproba adicionalmente e suma di Afl 120,- cu lo wordo paga directamente n’e scolnan despues cu e mayor(nan) entrega tur e documentonan necesario y cumpliendo cu tur rekisito.
Mi ta contento pa mira cu Gobierno di Aruba ta keda cristalisa su vision y mision pa eleva calidad di bida di nos hendenan den tur sector di nos comunidad. E biaha aki cu un enfoke special pa brinda nos muchanan e oportunidad pa nan nunca keda atras di loke ta nan derecho fundamental y universal di haya e oportunidad na un miho bida y porvenir.
