Parlamentario Shailiny Tromp-Lee (MEP):‘Nos Himno y Bandera ta simbolonan di e lucha pa libertad, Ban hunto celebra y sigui forma nos nacion’

ORANJESTAD – Aruba henter ta celebra dia di Himno y Bandera dialuna awo. Un dia nacional. Un dia pa refleha kico tur ta Aruba. Un dia pa sinti bo patriotico y demostra e amor cu bo ta sinti pa Aruba y reflexiona kico tur Aruba ta duna bo tan generosamente. Sinti bo Arubiano! No obstante cualkier diferencia cu por tin, dialuna awor, nos tur lo sa di uni den un solo celebracion y engrandece asina nos cultura y sentido comunitario.

Ta un ocasion tambe pa felicita pueblo henter, pa e echo cu na aña 1976 tabata e prome biaha cu oficialmente e Himno y Bandera di Aruba a keda estrena den un Wilhelmina Stadion yen di Arubianonan consciente y orguyoso di nan identidad. E momento historico aki tabata un paso simbolico di gran importancia pa e lucha pa Aruba su Status Aparte y su autonomia. E sentimento cu esunnan cu a sa di biba esaki den alma y curpa presente eyden dia 18 di maart 1976, nunca lo mester bay perdi. P’esey, ta nos turno awor pa traspasa e sentimento di orguyo triunfal ey, na e hobennan cu awe ta buscando nan propio rumbo, pa asina nan tambe balora e lucha cu tabata tras di e simbolonan aki.

E balornan aki mester keda traspasa pa sigura cu Aruba ta mantene su autonomia y nos por sigui hacie mas fuerte. E lucha pa libertad ta sigui asina den un forma nobo. Ban lanta hobennan liber di mal influencia di droga of cualkier otro adiccion. Liber pa por defende nan mes den nan propio idioma cu nan mesun pensamentonan. Liber di tur e sclavitudnan moderno. Liber pa por ta exitoso y feliz den bida. Ban den union familiar, sigui cu e lucha pa libertad.

P’esey awor cu nos como pueblo ta celebra nos simbolonan aki, ban lanta e orguyo di nos hobennan pa e lucha sagrado pa un Aruba riba su propio pia. Sin necesidad di cualkier supervision alguno. Ban core rond cu nos bandera, nos T-shirt y otro decoracion, expresando nos amor patriotico. Tur esakinan mester ta parti di nos cultura pa forma asina e pais cu nos grandinan a lucha pe.

Actividad tin tur rond. Movecion lo tin hopi y p’esey mientras nos ta ban engrandece e celebracion, ban sigur y trankil riba careteranan. Ban duna e norma e balornan di ser humano, di bida y lealtad pa patria, un celebracion cu nos tur merece y cu nos por gosa di dje.

Feliz Dia di Himno y Bandera! Pabien Aruba!