Parlamentario Shailiny Tromp-Lee (MEP): ‘Trahadonan mester ta consciente cu nan no ta perde nan derechonan laboral door di COVID-19’

Desde cu COVID-19 a yega Aruba e tabatin y te ainda tin un impacto directo y grandi riba mayoria di nos trahadonan aki na Aruba. Aruba, mescos tur pais rond mundo, no tabata prepara pa un virus sin precedente cu a bin ‘freeze’ casi e pais completo.

Na momento cu e situacion di crisis a surgi, a cera scolnan, a introduci shelter in place y toke de queda, cual a conduci cu negoshinan a cuminsa cera nan porta completamente y tin a keda duna servicio na un manera ahusta y adapta. Esaki a conduci cu nos trahadonan a keda manda cas bou di diferente condicion: tin a keda manda cas inicialmente cu vakantie obligatorio, tin nan salario a keda rebaha, otro nan cantidad di ora y salario a keda ahusta y tin a keda manda cas cu ‘no work, no pay’.

Trahadonan mester ta consciente cu ningun decision di parti di nan doño di trabou encuanto nan contracto laboral por keda cambia unilateralmente. Tur decision mester tuma lugar den consulta cu e trahado. Lastimamente como parlamentario cu ta keda acerca pa diferente persona pa conseho of pa duna informacion, mi mester conclui cu no tur ora esaki tabata y ta e caso. Mirando e situacion di crisis y cu e trahado tin miedo pa perde su trabou (den futuro), e ta bay di acuerdo y no ta percura pa asesora su mes bon prome cu e firma cualkier areglo di trabou nobo. Esaki sigur ta algo preocupante. Hopi no ta condiciona tampoco e cambio na tempo/periodo y ta percura pa laga registra cu nan no ta distancia di nan derecho a base di nan contracto laboral.

Loke ta resalta ta e echo cu por ehempel esnan cu a keda manda cas cu vakantie obligatorio no ta tur a keda paga 100%. Esaki sigur no mag sosode. E doño di trabou tin e deber di paga e trahado su salario completo den e caso aki of mester a yega na un areglo di pago diferente of ta deduci menos dia di vakantie.

Otro fenomeno actualmente ta e aplicacion pa loonsubsidie. Tin compania ta casi obliga un trahado pa firma cu nan ta bay di acuerdo cu un pago di 60% di nan salario. Indicando directamente cu nan di ningun manera ta bay aporta cu nada den e tempo di crisis aki, cual mi ta haya cu no por. Ta spera cu solamente e trahado ta entrega 40% cual lo por ta den ora di trabou of na salario. Otro exigencia cu tambe por keda mira ta cu e doño di trabou ta indica cu e ta spera di e trahado cu e ta bay di acuerdo cu e mester eherce diferente funcion. Esaki tambe ta algo cu na mi opinion no mester keda acepta sin mas y mester sinta dialoga y condiciona dado caso e trahado ta di acuerdo.

Mi ta di opinion cu unabes cu loonsubsidie bira un realidad, aplicacion di ‘no work, no pay’ no mag di ta aplicabel mas. Poco poco mester bay na normalidad bek caminda sigur no mester tin espacio pa un grado di tolerancia pa cu derecho di trahadonan ta keda trapa. Un ehempel bibo ta cu ta spera pa e trahado entrega ora y salario pero ora di stipula overtime kier sali for di e punto di salida di 8 ora di trabou.

Mi ta conseha tur trahado pa exigi tempo pa pensa y busca conseho na Departamento di Labor prome cu bo firma cualkier convenio nobo. Bo por yama na 5237720/5943092 of por e-mail na dao.arbeidsgeschillen@gmail.com of directiearbeid@gmail.com. Enberdad nos ta den crisis pero esaki no ta hustifica cu un trahado mester entrega tur su derechonan. Mi ta bolbe enfatisa e echo cu ningun cambio/condicion den un contracto laboral por keda cambia unilateralmente y cu como trahado bo no por keda obliga di firma nada, sigur no sin busca conseho prome. Bo tin derecho di tempo pa pensa y busca conseho.

Pa finalisa mi kier subraya cu Gobierno a bin cu FASE, sosten financiero pa negoshi chikito y mediano y subsidio di salario. Tur esakinan tin como meta pa mantene mas tanto trahado posibel na pia trabou y evita retiro.