Parlamentario Shailiny Tromp-Lee (MEP): Ta un lastima cu oposicion ta mal informa y no ta duna informacion completo

Den medionan di comunicacion Parlamentario Sra. Mervin Wyatt-Ras a trata e relato di trabou di aña Parlamentario 2019-2020. Un relato cu ta keda traha y presenta semper na clausura di un aña parlamentario. Segun Wyatt-Ras for di e relato por tuma nota cu no tabatin mucho reunion y preguntanan no ta ser contesta manera mester ta. E relato aki tin como fecha 7 di September 2020.

Specialmente e ta indica cu di e reunionnan di comisionnan fiho di Parlamento ta esunnan di Husticia y esun di Salubridad so tabatin mas reunion. Esaki sigur no ta e caso. Pa ta exacto esakinan ta e cantidad di reunionnan cu tabatin di algun di e diferente comisionnan (commissie: cie):Cie. Huishoudelijke Aangelegenheden 15 reunion, Cie. Sociale Zaken, Gezin, Ouderenzorg en Volksgezondheid 14 reunion, Cie. Justitiële Aangelegenheden, Integratie en Verzoekschriften 11 reunion, Cie. Arbeid en Primaire Sector 11 reunion, Cie. Financien, Economische Zaken en Overheidsorganisatie 8 reunion y Cie. Infrastructuur en Milieu 6 reunion. Pueblo mes por tuma nota cu loke oposicion ta informa no ta corecto. Pregunta ta dicon tanto enfasis di oposicion pa presenta informacion incorecto y sigur incompleto. Dicon no ta informa pueblo cu hopi di e miembronan di su Fraccion cu ta forma parti di e diferente comisionnan practicamente no ta asisti na e reunionnan.

Oposicion ta pidi pa mas reunion cu toch nan no ta asisti na nan

Mi por uza como ehempel e Comision di Labor y Sector Primario cu mi persona ta presidi. En total mi a yama 11 reunion durante aña parlamentario 2019-2020. E comision ta consisti di e siguiente miembronan di Parlamento: Hendrik Tevreden, Ricardo Croes, Setty Cristiaans-Yarzagaray, Endy Croes, Robert Candelaria, Arthur Dowers, Mervin Wyatt-Ras, Jennifer Arends-Reyes y Alan Howell. Mirando e asistencia di miembronan di Fraccion di AVP na e reunionnan mi no ta compronde tanto reclamo. Pa loke ta trata su coleganan Dowers y Arends-Reyes nan no a participa na ningun reunion y pa loke ta trata Candelaria y Wyatt-Ras ambos a participa na 6 di e 11 reunionnan yama.

Informacion incorecto di preguntanan contesta door di Gobierno

Hopi atencion tambe a keda poni den e contestacion di pregunta door di Gobierno y aki tambe mi kier a para keto un rato, pasobra un biaha mas e informacion cu a keda presenta ta saca un tiki for di contexto. Sra. Wyatt-Ras ta indica cu solamente 40.4% di e preguntanan a keda contesta y cu gobierno lo ta in transparente of no ta contesta. Esaki sigur no ta corecto. Un biaha mas mi lo haci esaki a base di un ehempel. Den e relato bo por lesa cuanto pregunta un parlamentario a haci y cuanto contesta e la ricibi. Si mi uza caso di dos colega di Sra. Wyatt-Ras mi por ilustra dicon e conclusion cu e ta presenta pueblo no ta corecto.

Segun e relato su colega Robert Candelaria a haci en total 110 pregunta y a ricibi 20 contesta. For di nos sistema interno na Parlamento bo por saca afo cu 52 di e preguntanan aki a keda entrega medio augustus 2020. Esaki ta indica cu apenas a pasa 14 dia di trabou cu Gobierno a ricibi esakinan (fecha cu e relato a keda traha). Esaki ta conta por ehempel pa su colega Marlon Sneek tambe. Di su 283 pregunta haci, 163 a keda contesta y di loke falta 66 a kedahacidianan28 juli (17 pregunta), 29 di juli (4 pr) y den augustus 2020 dia 7 (17 pr), 13 (15 pr) y 18 (13 pr).

No ta usual cu den 1 pa 2 siman di tempo nos como parlamentario ta ricibi un contesta pero depende di e topico y e pregunta ta rekeri su tempo pa gobierno por manda nos un contesta. Si en berdad preguntanan no ta keda contesta esaki sigur no ta un situacion aceptabel pero mediante e dos ehempelnan mi kier a mustra cu no sin mas por saca cierto conclusionnan.

Sigur e parti caminda Sra. Wyatt-Ras ta enfatisa cu Minister President mester duna ehempel y cu e no ta contesta pregunta mi mester contra aresta. Minister President a demostra cu e ta haci su maximo esfuerso pa semper ta transparente y si no ta por escrito, durante di reunionnan ta percura pa duna contesta of splicacion. Problema ta cu of nan no ta na trabou, of a firma lista di presencia pero na luga di keda den sala scucha ta prefera di bay sinta combersa den nan camber of na balie di cushina.

Pa loke ta trata prestacion di nos Presidente di Parlamento actual mi lo bisasra.Wyatt-Ras pa e tuma bon nota y siña pasobra pueblo no ta lubida loke e a tolera y participa na dje den pasado como Presidente di Parlamento.