Parlamentario Shailiny Tromp-Lee (MEP): Segun AVP Citgo tin placa. Pregunta ta unda e placa aki ta?

Te hasta durante e crisis actual AVP ta trata na mal informa pueblo y asina obstaculisa oportunidadnan nobo pa pais Aruba. Awe den sala di reunion parlamentarionan di AVP ta enfatisa cu Citgo tin placa. Segun Tromp-Lee pregunta di dia ta bira: Unda e placa ta? 

Si nan tabatin placa y a inverti y cumpli cu palabracion, nos no lo ta trata terminacion di e contracto awe den Parlamento. Nos lo tabatin un negoshi up and running, cu lo a crea e cuponan di trabou premira y aportando na nos economia y caha di gobierno. Lastimamente esey no ta e realidad. Citgo no tin placa ni pa inverti, no pa paga huur y a indica di aña pasa cu nan no por paga mas gastonan di personal.

Mirando e actitud di AVP den Parlamento ta necesario pa duna splicacion riba e ley cu nos ta tratando awe 9 di april 2020 den sala di Parlamento pa loke ta trata apoderacion di Gobierno pa termina contracto cu Citgo.

E apoderacion ta trata exoneracion di Citgo di e parti di desmantelacion y tambe daño contra medio ambiente cu nan lo por a ocasiona desde cu nan a bin Aruba.

No ta regala nada na Citgo.
Ningun momento Aruba ta regalando Citgo 340 miyon florin manera AVP a bin ta mal informando pueblo den prensa ultimo dianan y awe den sala. Al contrario, ta asina cu Gobierno di Aruba a logra den e negociacion pa Citgo cumpli cu e pago di 28 miyon florin di impuesto cu nan debe y a percura pa tur empleado haya un pakete segun nan añanan di servicio.

Un di e claim cu ta wordo dispensa ta un claim riba desmantelacion. Manera ta conoci Citgo no a cumpli cu inversionnan cu mester a tuma luga debi na sancionnan di Merca. E claim ta encera cu si Gobierno di Aruba dicidi cu kier desmantela anto CITGO ta esun responsabel pa desmantela. Y e desmantelacion aki ta wordo balora na un suma maximo di 150 miyon dollar.

Realidad ta cu Aruba no kier desmantela!
Otro realidad ta cu si Aruba lo kier a desmantela mes, Aruba lo mester bringa esaki den arbitrahe internacional. Un proceso cu lo dura hopi aña sin ningun garantia pa Aruba. Y si Aruba gana e caso aki mes, Citgo ta wordo obliga pa desmantela e refineria pero no pa paga pais Aruba e suma di 150 miyon dollar.

Otro claim cu ta keda exonera ta e daño medio ambiental cu Citgo por a ocasiona desde cu nan a bin Aruba. E problema grandi ta cu Gobierno di AVP no a laga haci un “base line study” (nulmeting) na 2016 cual ta haci hopi dificil pa stipula kico e daño ocasiona door di nan lo por ta den e periodo entre 2016 pa 2020. Pero e realidad ta cu Citgo no a opera mes y e daño real lo ta minimo.

Tromp-Lee ta haya importante pa remarca cu Citgo no a percura pa mantencion debido na e refineria. Pues si pais Aruba drenta den un bataya legal, cual lo dura hopi aña, e refineria lo deteriora mas y pais Aruba ta perde un oportunidad unico pa capitalisa riba oportunidadnan economico nobo cu por mitiga e impacto economico di e crisis actual.