Parlamentario Shailiny Tromp-Lee (MEP): ‘Pueblo ban pone tur diferencia un banda y laga nos hunto reconstrui y pone nos pais bek riba pia’

Recientemente Gobierno a duna di conoce cu banda cu nos mester domina e crisis di salud relaciona cu COVID-19 mester traha riba e fase di recuperacion economico. Pa esaki minister president Evelyn Wever-Croes a presenta un structura amplio cu ta encarga cu tur e trabounan relaciona cu esaki.

Tres Comision Special.
Banda cu Gobierno a institui un stuurgroep cu ta guia e proceso, tambe a institui diferente comisionnan special. Tin tambe un ‘think tank’ consistiendo di varios persona prominente den comunidad, entre nan e ex gobernadornan di pais Aruba, pa duna conseho y guia na e stuurgroep. Bou di e stuurgroep tin, te cu awor, 3 comision activo encarga cu: stabilisacion y estimulo (inmediato), fast track (termino corto) y innovacion y durabilidad (termino mediano y largo).

1. Comision stabilisacion y estimulo.
Cu e comision di stabilisacion y estimulo Gobierno ta brinda asistencia inmediato na companianan, pa asina companianan mantene trahado den servicio door di duna e doño di trabou un subsidio di salario. Pa esnan cu asina mes perde trabou, tin un asistencia financiero temporal, den e proyecto di FASE. E proyecto FASE a wordo anuncia ya 3 siman pasa y recientemente e asistencia na comercio a keda presenta.

2. Comision fast track.
Manera informa pa Gobierno den e comision di fast track ta prepara e proyectonan cu ya caba tabata den fase basta avansa y asina cu stop cu shelter-in-place, por start sali cu e nan. Ta trata di inversionnan priva y publico, cu ta genera cupo di trabou pa esnan cu a perde trabou, y cu lo atrae devisas pa fortifica e balor di nos florin.

3. Comision innovacion y durabilidad.
E ultimo comision cu ta trata innovacion y durabilidad lo delinea e modelo economico nobo pa Aruba. Mas cu claro Gobierno ta indica cu turismo lo sigui ta un pilar economico importante, pero nos no por keda conta riba turismo so. P’esey e comision aki lo prepara plannan pa un modelo economico nobo, duradero y fuerte, basa riba innovacion.

Trece bo ideanan dilanti.
Tromp-Lee ta indica cu e interes den comunidad ta grandi pa yuda den e proceso aki y ta aplaudi tur cu ya caba a compromete nan mes boluntariamente pa participa na e proceso y ta haci un yamada na tur esnan cu via medionan social a bin ta vocifera nan idea y sugerencianan pa join e proceso aki tambe. Ta den un plataforma nacional nos por berdaderamente aporta y haci un diferencia.

Segun Tromp-Lee trahando hunto, kibrando cabes y den dialogo nos lo por berdaderamente reconstrui nos pais y pone bek riba pia.

Solamente hunto nos lo logra.
P’esey mes Tromp-Lee ta aplaudi e caminda cu Gobierno ta encaminando. Ta keda na nos awor pa pone diferencia un banda y haci uzo di e scenario unico aki cu e situacion di COVID-19 a brinda nos pais. Aruba mester tum’e cu man habri! Tromp-Lee ta haci un apelacion special na pueblo pa ban hunto stipula e rumbo cu nos kier hiba nos pais Y asina crea un miho mañan pa nos futuro generacionnan. Un Aruba cu un economia fuerte y resiliente y mas importante ainda un Aruba dushi pa biba.