Diaranson ultimo mi a asisti na e prome Foro Nacional pa Adulto Mayor. Combersando cu algun persona cu tabata presente sigur ta resalta e echo cu mas y mas nos ta birando consciente cu pa logra progreso y bienestar pa e grupo di nos grandinan nos mester realisa cu solamente trahando hunto nos lo logra esaki. Cu otro palabra no solamente Gobierno pero tambe sectornan priva, semi-publico y pueblo en general.

Na mi opinion cada persona mester ta consciente cu bienestar no ta solamente e parti financiero pero tambe e parti di atencion, stimacion y tempo di calidad cu hopi biaha nos grandinan ta carece di dje di parti nan famia. Mas y mas nos ta busca hustificacion tras di e bida druk y yena di compromiso cu nos tin cu ta pone nos lubida di esnan cu a laga nos yega unda nos ta awe.

Ta un echo cu e grupo di nos grandinan ta birando dia pa dia mas grandi. Un tendencia mundial cu cada pais na nan manera ta atendiendo cune. Durante e foro Minister di Transporte, Integridad, Naturalesa y Asuntonan di Adulto Mayor, Sr. Ursell Arends a presenta su vision y maneho pa nos adultonan mayor. Sigur su enfasis poni ariba e compromiso colectivo necesario pa nos por logra e bienestar general desea pa nos adultonan mayor a keda carga pa tur esnan presente.

Pa partido MEP e grupo di nos adultonan mayor ta un prioridad caminda nos por mira cu e ultimo añanan Gabinete Wever-Croes a bin ta haciendo hopi cos na beneficio di nos adultonan mayor, entre otro a aumenta e pensioen di biehes, a bin cu campaña y programa dirigi pa e grupo nucleo aki via DVG, a reduci e peso di impuesto pa nos grandinan y a aumenta reparatie toeslag. No obstante esakinan mi ta aplaudi e organisacion di e foro nacional aki caminda diferente stakeholder por a presenta nan idea y sugerencianan.

Nos grandinan sigur merece miho y cu un expectativa hopi positivo mi ta spera cu trahando hunto, dirigi y cu un meta bon fiha nos ta bay logra realisa e bienestar cu tanto a keda papia di dje durante e dos dianan di e foro.

Un pabien sigur ta na su lugar pa Minister Arends y comite organisado cu a haci e foro “Hunto nos por crea progreso y bienestar pa nos adultonan mayor” posibel. Alabes na tur participante di e foro un palabra di gradicimento pa nan aporte y compromise demostra.