Diabierna ultimo Parlamentario Shailiny Tromp-Lee a asisti na iniciacion di miembronan activo di Parlamento Hubenil Aruba (PHA) den sala di Parlamento. En total 22 hoben ta activo cu Parlamento Hubenil. Nan ta hobennan di 13-23 aña di edad. Un dia cu su persona sigur tabata extra orguyoso mirando cu su yiu muhe Shayna Tromp di 15 aña tambe ta forma parti di e grupo. Tromp-Lee ta felicita tur hoben y nan mayornan. 

Parlamento Hubenil ta un tremendo plataforma pa formacion di nos hobennan. Sigur mi ta sostene nan proposito di crea lidernan nobo pa futuro y pa desaroya y promove e proceso democratico entre nos hobennan. Alabes ta di aplaudi e echo cu nan ta traha pa desaroya y promove un cultura di debate entre e hobennan, algo sumamente necesario mirando nos sistema educacional. Nos mester sigui traha riba e formacion total di nos hobennan pa nan por tin confiansa propio, pa nan por para pa nan opinion y aporta constructivamente na desaroyo di nos pais y di nos mundo. Durante nan miembresia e hobennan ta haya formacion riba diferente tereno entre otro nan ta haya lesnan di protocol, con ta prepara un speech, public speaking, con ta hiba debate y mucho mas.

E iniciacion tabata un atardi hopi ameno, no solamente pa e hobennan pero tambe pa nan mayornan/famia. E iniciacion a cuminsa caminda e hobennan a repasa e articulonan di constitucion cu ta carga e organisacion di Parlamento Hubenil. Despues nan a trata e vision di PHA cu ta pa forma hobennan ehemplar pa Aruba cu mester percura pa nan bos keda scucha di un forma liber y cu respet pa nan opinion. Nan a sigui accentuando e mision di PHA cu ta cu como organisacion via Tratado di Derechonan di Mucha y su structura democratico participativo, lo empodera hobennan pa defende tur locual ta relevante pa e bienestar di un hoben den nos pais sin importa su origen, religion, pensamento, sentimento o creencia. Y asina e atardi a sigui accentuando kico tur PHA ta para pe, y na ki manera e ta forma nos hobennan.

Pa finalisa Parlamentario Tromp-Lee a bisa cu e ta desea PHA tur clase di exito cu e proceso di desaroyo di nos hobennan caminda nan ta enfoca riba nan habilidadnan cognitivo, social, cultural, expresivo, internacionalismo y innovacion. Pero mas importante el a indica cu e ta sostene PHA den nan meta pa mantene nan mes na e balornan fundamental cual sigur ta esencial den e formacion di nos hobennan. Mas cu claro e ta gradici cada un di e miembronan di directiva y e trahadonan di PHA pa nan bunita trabou.