Ex minister Benny Sevinger (AVP) a critica e intencion cu gobierno, muy particularmente di minister Otmar Oduber (POR) y su maneho di independisa of descentralisa instancia di e sector publico, sin tin mester.

El a bisa cu e mesun maneho cu e mandatario aki ta hibando awor, tambe nan a wordo cuestiona, ora cu el a forma parti di e gobierno anterior. “Nos a cuestiona, y nos ta keda cuestiona”, parlamentario Sevinger a bisa. Te hasta el a laga sa cu esaki tabata e motibo cu a causa cu e politico Oduber a ‘independisa’ fei partido AVP y bin cu su propio partido.

“Esey tabata e crash cu nos tabatin. P’esey el a bay tambe. Esey ta e parti esencial di e crash nan cu nos tabatin cu e minister aki.” Sr. Sevinger a laga sa cu e kier adverti e gobierno aki di minister Oduber su ‘modus operandi’, ya cu e ta siguiendo ainda cu esaki. Pero e ta haya cu si gobierno no kier tum’e y nan kier sigui den e direccion ey, ‘be my guest’.

Independisacion y extra placa

Segun parlamentario Sevinger, e no kiermen cu privatisacion ta malo. E ta haya cu independisacion of privatisacion ta bon ora cu e ta wordo haci na beneficio di e pueblo na prome luga. Tambe e ta un proceso cu ta demanda pa haci’e di un forma responsabel.

El a trece su experiencia cu e mandatario Oduber su intencion ta pa privatisa instancianan gubernamental, tempo cu nan a forma parti di e gobierno anterior. E ta haya cu no solamente mester privatisa pa bo por tin un compania of stichting nobo. Pero parlamentario Sevinger ta cuestiona kico e minister su intencion ta, pa e por tin presupuesto y placa extra pa por nombra y duna contract, etc.. Eynan e ta haya cu e crash a cuminsa cu e mandatario Oduber, tempo cu nan tabata den e mesun team di gobierno.

Parlamentario Sevinger a bisa cu e tipo di crash nan tabata tin’e pa e mesun causa cu ta sosode awor, caminda e mandatario en cuestion kier haya extra placa y briya su so. El a trece dilanti e caso di ATA cu a wordo independisa tempo cu sr. Oduber tabata minister di Turismo den gabinete Mike Eman I. E parlamentario Sevinger a bisa cu na momento cu presupuesto di ATA tabata pasa 100 miyon, nan tabata hala atencion di minister Oduber, ya cu e placa cu a resta mester bay na minister di financia, pa asina e aloca na diferente ministerio.

“Pero ya, fei e tempo aya, e mandatario actual di infrastructura y medio ambiente tabata ‘bende nos un picture”, e di. El a relata cu su ex colega tabata bin cu otro proposicion di biaha pa drecha tal proyecto, pa ehempel esun di Paradera Corridor. Aunke e tabata un proyecto cu ministerio di Infrastructura tabata encarga di dje, pero na final tabata e mandatario Oduber esun cu tabata dicidi ki tipo di proyecto e tabata kier, segun parlamentario Sevinger. E ta haya cu e tempo aya, nan ex colega Oduber kier a bin cu un ‘gobierno den gobierno’.

El a bisa cu e experiencia ey nan a pasa aden cu TPEF (Tourism Product Enhancement Fonds). Segun sr. Sevinger, e placa cu mester bay na caha di gobierno, pero nan ex colega a bin cu e argumento cu e hotelero no kier duna e placa, pasobra nan no ta kere den gobierno, sino cu e placa mester wordo manda pa un fondo cu mester destina pa e producto turistico. Sinembargo den conseho di minister, e tabata bay di acuerdo pa aloca e placa aki, ya sea pa enseñansa, infrastructura, etc.. Pero ora e momento a yega pa ehecute, nan ex colega ta bisa nan cu e tabata facilita e placa, pues e mester ta esun cu mester haya tur reconocimento. “Kiermen e gobierno no mester briya, ami so mester briya”, parlamentario Sevinger a bisa. E parlamentario a bisa cu esaki tabata e crash cu nan tabatin cu e minister Oduber, tempo cu el a forma parti di nan gabinete, den e gobierno anterior Mike Eman I y II.

E ta haya cu ta e mesun situacion cu ta wordo presenta cu Serlimar awor. Segun e parlamentario, e minister encarga cu Serlimar ta buscadondo extra placa pa paga entre otro e huur di edificio na Pos Chikito, y asina faborece un sponsor di su partido.

El a referi cu durante e tratamento di presupuesto 2018, minister di infrastructura y medio ambiente den su contesta tocante Serlimar a bisa cu no tin placa pa e edificio ey. Segun parlamentario Sevinger, esaki ta un motibo cu nan kier bin cu e tarifa obligatorio cu a produci reaccion den comunidad. Pero tambe e ta kere cu e mandatario kier haya extra placa, ya sea pa tuma mas hende den trabou y firma contract den Serlimar. Sr. Sevinger ta kere cu e intencion di e cobramento aki ta pa ‘minister por tin un banco na banda’.

E ta skeptico cu e reunion cu fraccion di MEP a pidi pa atende e asunto di tarifa di Serlimar, cu inicialmente a wordo cancela y awor a wordo programa pa otro luna, no ta bay caba na nada. “Mi por bisa di awor caba, e reunion aki ta bay caba cu e minister ta haciendo un bon trabou”, el a finalisa bisando.