Diaranson siman pasa Prome Minister di Aruba, Evelyn Wever-Croes y Minister di Asuntonan Economico, Finansas y Cultura, Xiomara Maduro, a bin Parlamento pa duna informacion di efectonan di Covid-19 relata na e situacion di financiero economico di pais Aruba, cu a encera tambe e sosten di likides cu Aruba a ricibi y ta bay ricibi di Hulanda.

 

Debate den Tweede Kamer di Staten-Generaal.
Por a tuma nota cu dia 20 di mei ultimo a tuma luga un debate den Tweede Kamer riba preguntanan haci encuanto presupuesto supletorio incidental door di e sosten financiero di likides brinda na paisnan den Caribe di Reino Hulandes. Prome cu e debate aki, pa ser exacto dia 14 di mei ultimo, Staten di Aruba a ricibi e rapport di Economisch Bureau Amsterdam cu e titulo “Kleine eilanden, Grote uitdagingen”. E rapport aki a wordo traha riba opdracht di Tweede Kamer di Staten-Generaal cu segun e publicacion e informacion ta basa riba investigacion haci.

Durante e debate plenario por a nota disertacionnan di diferente miembronan di Tweede Kamer cu a duna reaccion y a duna opinionnan tocante e rapport aki. Hasta por a nota expresionnan basta skerpi y conclusionnan fuerte den direccion di Aruba, Corsou y St. Maarten uzando entre otro e rapport aki como base di informacion.

Reunion publico den Parlamento di Aruba.
Parlamentario Christiaans-Yarzagaray a pasa door di e contenido di a rapport “Kleine eilanden, Grote uitdagingen” y por a nota cu esaki ta contene proyeccionnan propio di e instituto relata na Aruba. Considerando e background investigativo di e Parlamentario y su experiencia di 20 aña na CBS, uzo di informacion corecto ta sumamente importante. Sigur ora ta trata di tuma di decisionnan di direccion di maneho di un pais of di asuntonan estatal.

Pa e motibo aki, durante reunion publico den Parlamento, parlamentario Setty Christiaans-Yarzagaray a presenta un mocion pa urgi gobierno pa laga prepara un reaccion y analisis breve riba e rapport aki pa Parlamento door di departamentonan Arubiano. Den e caso aki Departamento di Asuntonan Economico, Comercio y Industria di Aruba, mirando cu Aruba tin un Modelo Macro Economico y tambe di parti di Central Bureau Statistiek, mirando cu nan tin conocemento y e panorama economico di Aruba (Cuentanan Nacional). Parlamento ta desea un analisis y reccion breve mas tanto riba contenido di e rapport aki, e base di e investigacion haci y e proyeccionnan presenta regardando Aruba.

Preparando pa reunionnan di IPKO.
Parlamento, apesar di situacionnan adapta unda varios reunionnan ta tumando luga virtualmente of cu medida di distanciamento, ta preparando pa un IPKO (Interparlementair Koninkrijksoverleg) den un forma digital. E reunionnan aki lo ta tumando luga otro siman cuminsando for di diaranson. Tin punto(nan) di agenda cu ta relata na e topiconan presenta den e rapport menciona. Pa e motibo aki ta urgi gobierno tambe si por a ricibi e reaccion y analisis breve di departamentonan menciona prome cu dia 10 di juni proximo.

Pa conclui.
Aruba y mundo henter ta den situacion dificil a consecuencia di e pandemia di Covid-19. Paisnan grandi cu economia amplio y situacion financiero estable mes tin nan retonan. E realidad ta cu Aruba y hopi otro pais di nos tamaño, nos retonan ta pisa hopi mas door di economia y finansas limita. Maneho di pais, specilamente den e situacion dificil aki, ta imperativo pa tin base di informacion corecto, real y sigur analisis sin eror. Nos no por afford den nos situacion pa haci fout! P’esey e Parlamentario ta kere den nos propio profesionalnan pa haci analisis y brinda informacion. E Parlamentario ta contento di por a ricibi sosten unanime pa su mocion presenta!