Parlamentario Setty Christiaans-Yarzagaray(MEP): ‘Negoshinan na Aruba tin poco mas confiansa y expectativa den e ultimo kwartaal di 2018’

Parlamentario Setty Christiaans-Yarzagaray den Conferencia di prensa semanal di Fraccion di MEP a elabora riba e rapport cu Banco Central di Aruba (CBA) recientemente a emiti. E rapport recien aki ta trata di e percepcion di negoshinan na Aruba cu a wordo registra den e di 4 kwartaal di 2018.

Despues cu CBA a emiti e publicacion di confiansa di e consumidor algun siman pasa, awor ta emiti e percepcion di negoshinan na Aruba na unda cu Banco Central di Aruba ta indica cu e percepcion of e index segun e calculacionnan, a registra un subida modera den e di 4 kwartaal di 2018. Esaki ta un indicacion cu negoshinan cu tin un poco mas confiansa den e kwartaal aki compara cu e kwartaal anterior. Negoshinan ta indica di ta poco mas optimista over di e situacion general a corto plaso.

Parlamentario Christiaans-Yarzagaragy ta indica cu Banco Central di Aruba, durante e trimester a investiga e percepcion aki cu ta consisti di condicionnan economico actual y a corto plaso di e situacion di negoshinan na Aruba. E rapport di CBA, segun parlamentario Christiaans-Yarzagaragy a splica, ta indica cu e percepcion di negoshinan a experencia un subida di 0.4% cu ta un subida modera. E tawata na 99% y a subi na 99.4%.

E subida aki, en principio ta un indicacion cu e confiansa di e negoshinan na Aruba den e di 4 kwartaal di 2018 a mehora un poco y si negoshinan tin e pensamento aki, segun e Parlamentario, esaki lo yuda stimula economia tambe siendo negoshinan e weso di lomba di economia.

“Unabes cu e negoshinan tin percepcion positivo y bon miras riba locual ta bay bin, ta duna un aire positivo pa e desaroyo di economia y pa e atmosfera economico esaki ta un bon señal”, e Parlamentario a expresa.

Parlamentario Christiaans-Yarzagaragy a duna di conoce cu e condicionnan economico actual den realidad, segun resultadonan, a baha un poco for di 100.3 pa 99.1 den e di 4 kwartaal di 2018, mientras cu e indice di expectativa di condicionnan economico a corto plaso a registra un subida di 97.0 pa 99.7.

Percepcion di negoshinan na Aruba ta consisti di diferente componente cu ta wordo midi: bou di Condicionnan economico actual tin Condicionnan economico na Aruba, Actividad di negoshi, Inversionnan di negoshi y Desaroyo den cantidad di empleo den negoshi.

E parti di expectativa di condicionnan economico a corto plaso, cu a experencia un subida for di 2.7%, tambe ta consisti di e mesun componentenan aki. Esaki, riba lineanan grandi ta indica cu negoshinan na Aruba tin un bon percepcion di e desaroyo cu ta bay bin, cu e Parlamentario ta considera atentado.

“Nos sa cu e pais tin hopi reto. Gobierno di Aruba ta enfrenta tur reto pa asina drecha e situacion financiero y social pero alabes desaroya un economia pa asina tur negoshi por tin miho share den esaki. Pero e simpel echo cu negoshinan ta pensa asina caba ta un bon noticia y un bon atmosfera pa crea mas actividad economico na nos pais”, parlamentario Setty Christiaans-Yarzagaragy a conclui bisando.