Parlamentario Setty Christiaans-Yarzagaray(MEP): ‘Gobierno di AVP a firma acuerdo cu Citgo na 2016 cu condicionnan cu nan mes no a comprende’

E crisis causa pa Covid-19 a yega tur skina di mundo y Aruba no a scapa e biaha aki. No ta un secreto cu e efecto di e pandemia di Covid-19 tin impacto hopi drastico riba economia y finansas di mundo y di pais Aruba cu ta dificil premira realmente con diferente economia lo bay ta despues di e efecto di e pandemia aki. Mirando e situacion cu Aruba tambe ta aden, mester tene tur oportunidad di estimulo di economia habri.

E topico di Citgo y e posibilidad di su traspaso tawata riba mesa prome cu Covid-19 a cambia curso di nos pais. Mirando cu desde 2016 te cu awor Citgo no a logra realisa su parti segun acuerdonan firma cu Gobierno di AVP, e Gobierno actual a cuminsa cu negociacionnan pa logra yega na un solucion pero mas ainda pa crea posibilidad pa actividad economico. Awe por bisa cu ohala cu tur e beneficionan economico y financiero cu a premira y a ser priminti door di gobierno anterior di AVP cu e deal di Citgo, a realisa pa Aruba. Pero realidad ta cu practicamente nada a realisa y pueblo di Aruba no a beneficiando cu e presencia di Citgo na Aruba!

Informacion robes atrobe di banda di AVP den prensa.
A tuma nota di declaracion di Parlamentario Sr. Arends di AVP cu tawata un di e ministernan cu su firma tambe ta riba e acuerdonan cu Citgo. E ta declara cu Citgo tawata tin US$ 1,3 biyon riba cuenta te cu Juni di 2019. Si esaki tawata e caso cu Citgo tin e capital aki, ta dicon Citgo no a inverti e $450 pa $685 miyon pa rehabilita y upgrade e refineria segun acuerdo y segun promesanan di AVP tur e tempo? Desde september 2016 te cu awe no tawata tin reapertura di refineria apesar cu AVP a celebra su reapertura 3 biaha. Kico Aruba a gana cu e deal cu gobierno di AVP y sr. Arends a cera cu Citgo realmente?

Sr. Arends ta declara tambe cu Gobierno a firma acuerdo cu Citgo Petroleum Corporation (CPC) siendo cu e mes a firma acuerdo cu Citgo Aruba Holding, Citgo Refining N.V. y Citgo Terminal N.V. Ademas di esey e Parlamentario pa AVP awe y demas coleganan di AVP ta pretende cu Aruba lo a perde di haya $150 miyon di garantia cu PDV Holding a para pa incumplimento di di Citgo. Sr. Arends no sa of no a comprende kico e’la firma y e condicionnan cu e mes a pone su firma na dje?

Condicionnan den acuerdo cu AVP y sr Arends a firma cu Citgo.
Garantia di PDV Holding a bira un “dode mus” y Aruba ta perde e oportunidad pa ricibi un parti di US$150 di garantia momento cu Richard Arends y AVP mes a firma tur e contractnan cu Citgo Aruba Holding, Citgo Refining N.V. y Citgo Terminal N.V. y NO a firma contract cu Citgo Petroleum Corporation (CPC). Ademas cu AVP a entrega inmunidad soberano di Pais Aruba tambe segun articulo 19.3 di Definitive Participation Agreement (DPA). Tambe Sr. Arends y AVP y firma pa entrega e derecho di Pais Aruba pa lanta caso contra Citgo pa daño di perhuicio pa cualkier incumplimento di e contractnan segun articulo 16.3 di DPA y 19.3 di RLA, a acepta cu sancionnan ta califica como un evento di Force Majeure (articulo 18.1 di DPA) y a acepta cu pa motibo di e sancionnan, Pais Aruba NO por tene Citgo y tampoco PDV Holding responsabel pa su imcumplimento pa motibo di Force Majeure (articulo 18.3 Excused Performance di DPA). Firmando e condicionnan aki tin consecuencia cu nunca Pais Aruba lo por claim PDV Holding pa incumplimento di Citgo Aruba. TUR esaki a consecuencia di e contractnan cu Sr. Richard Arends y AVP a acorda y mester bay investiga ta ken di AVP posiblemente ta perde entrada porta cu atrobe kier trece informa no corecto na pueblo.

Pa conclui.
Mientras cu ta berdad cu Citgo Petroleum Corporation ta un compania grandi y exitoso, e realidad ta cu AVP NO a firma contract cu Citgo Petrolem Corp (CPC) y pa e motibo di e contractnan firma y door di acepta cierto condicionnan, Pais Aruba NO por claim CPC, ni PDV Holding, ni Citgo Aruba.

E realidad di awe si ta cu Aruba mas cu nunca mester por crea estimulo economico y logrando termina e contracto aki por duna Aruba e oportunidad pa opera, via RDA, e terminal. Ademas cu por cuminsa sondea kico por desaroya riba e tereno cu Citgo tawata ocupa sin beneficio agrega pa pueblo Aruba, sea ta sigui cu refineria of tin oportunidadnan pa algo diferente of nobo pa pais Aruba.