Ta conoci di un par di dia caba cu presupuesto 2020 ta na Parlamento pa wordo trata. Informacionnan di cambionan y scenarionan drastico cu mester bay wordo presenta den presupuesto 2020 door di e impacto di Coronavirus a yega na nos y nos ta sumamente preocupa cu esaki.  Impacto di Coronavirus riba e salubridad di pueblo di Aruba ta un aspecto y e origen di e consecuencia riba e di dos reto mas grandi, cu ta e impacto financiero economico cu e combatimento di a virus aki ta trece cune. 

 

Begroting 2020

Tumando nota di a panorama financiero nobo cu nos a ricibi cu expertonan a prepara pa gobierno a refleha un cambio drastico cu a bay di un surplus di 44.6 miyon florin pa un deficit di 1,3 biyon florin. E realidad aki a dal nos hopi duro y profundo den nos curason cu si mi para keto y pensa mi ta puntra con esaki por ta posibel. Maneho di finansas publico tawata bayendo den asina bon direccion den apenas dos aña di tempo. Cu Coronavirus tur cos a cambia, mundo a cambia y esaki ta bay cambia nos bida tambe.

 

Coronavirus y su impacto na Aruba

Den apenas algun dia cu e prome caso di Coronavirus a wordo registra na Aruba medidanan mester a wordo introduci pa preveni cu e virus ta plama y contagia un cantidad grandi di hende. Esaki teniendo cuenta cu Aruba cu capacidad den sector di salubridad manera tur pais y siguiendo protocolnan y richtlijnen di World Health Organization (WHO). E impacto di e medidanan necesario aki pa evita un outbreak a wordo sinti mesora ora nos ta wordo acerca pa cantidad di hende cu a cuminsa perde trabou y entrada pero tambe comportacion di nos hendenan a cuminsa cambia pa preocupacion.

 

Mocion di POR di 1,000 florin pa 3 luna

Pa nos fraccion, sabiendo cu e situacion ta bay bira duro mirando ya cuanto hende ta acercando nos pa ayudo y e panorama diferente di e presupuesto 2020 a duna, logica ta bisa nos cu nos tambe mester yuda y ta solidario pa e situacion cu nos ta bay confronta!

Den proceso di tratamento di presupuesto 2020 nos a wordo sorpresa cu un mocion di colega di Coalicion na unda el a pidi nos, nos sostene su intencion por medio di un mocion pa Parlamentarionan entrega 1,000 florin pa 3 luna.

Mi pensamento y e pensamento di fraccion di MEP ta cu nos NO kier mara nos mes na djis 1,000 florin pa 3 luna mirando cu nos por a wak den presupuesto 2020 cu e impacto ta bay ta mucho mas cu esey y ta bay dura mas cu 3 luna so.

Si nos mara nos mes sa solamente 1,000 florin pa 3 luna pero Gobierno bin cu un proposicion pa nos entrega mas cu esaki tambe ta pensa cu logicamente nos mester por yuda miho y mas cu djis 3,000 florin total den un gap presenta di 1,300 miyon florin.

 

Conclusion

Nos kier duna pueblo di Aruba e siguransa cu fraccion di MEP ta bay yuda den e situacion aki pero no kier a mara nos mes na un plafond maximo di 3,000 florin manera ta e intencion di colega di POR. Como Parlamentario semper nos ta wordo acerca pa ayudo caba y esnan cu sa esaki y ta ricibi ayudo sa. Pero nunca nos ta papia di dje of ta bisa publicamente algo riba esaki. Nos ta pensa cu semper esaki tawata asina pues no ta un cos di awor. Semper cu mi haci esaki mi a hacie di curason y awor mas cu nunca nos curason y logica ta bisa nos cu nos por yuda miho y mas cu 3,000 florin total!