ORANJESTAD – Departamento di Asuntonan Economico a lansa su Website nobo e siman aki. Parlamentario Setty Christiaans-Yarzagaray ta duna elogio y felicitacion na e Departamento, na unda brevemente el a pertenece, cu nan Website nobo cu no solamente un imagen nobo pero cu un miho claridad di ki tipo di servicio e departamento ta bin ta brindando na pueblo.
E Parlamentario a tuma nota cu e Departamento ta duna un bista cla di nan maneho economico compartiendo informacion y documentonan pa pueblo lesa y haya un bista kico ta e plan y trabounan di e departamento den e ultimo temponan. E parlamentario, como empleado di tanto Departamento Economico y Oficina Central di Estadistica (CBS) pa basta aña, ta aplaudi e desaroyo aki pasobra den e ultimo añanan tawata tin hopi limitacionnan pa e departamentonan aki. No solamente limitacion den e forma di capacidad humano sino tambe den e capacidad financiero, cu a stroba un miho formacion y desaroyo cu por haci cu e departamentonan aki por maneha miho y haci miho trabou.
Parlamentario Setty Christiaans-Yarzagaray ta indica cu ainda tin basta hende cu no ta na altura di e servicionan cu e Departamentonan aki ta brinda pueblo y como Parlamentario ta necesario pa informa pueblo cu e informacionnan aki ta existi riba e website aki. Felicitacion ta bay na e Departamento di Asuntonan Economico cu nan Website nobo awo cu informacion mas visibel y atractivo.
