ORANJESTAD – Parlamentario Setty Christiaans-Yarzagaray a felicita gobierno y Universidad di Aruba pa e logro di un facultad nobo na Universidad di Aruba. E facultad SISSTEM sigur ta un bon noticia pa enseñansa aki na Aruba. Den cuadro di kere den e hubentud di Aruba y encurasha nan pa haci nan estudio na Aruba mes, e facultad aki ta brinda e oportunidad y variedad na Aruba mes, cu pa hopi di nos hobennan lo ta un alivio, specialmente esunnan cu ta mas limita.
Como un persona cu a studia afo, parlamentario Christiaans-Yarzagaray ta di opinion cu ta importante pa hobennan tin e oportunidad pa studia na Aruba mes, aunke cu studia afo, segun e Parlamentario, tin su beneficionan entre otro por yuda trece e balansa den loke Aruba no tin pa ofrece y e experencia cu lo obtene bibando na un otro pais.
Den cuadro di e parti di e ‘Sustainable Island Solutions’, a bin cu e area di STEM; cu ta Science, Technology, Engineering y Math. ‘Research’ tambe lo bay ta un parti hopi importante den e facultad aki.
“Biniendo for di e mundo di ‘research’, mi ta sostene e esaki totalmente. E ta mustra con importante ‘research’ ta na mundo practicamente den tur area di estudio. Ta di aplaudi cu nan ta pone importancia grandi riba esaki”, e Parlamentario a expresa.
Parlamentario Christiaans-Yarzagaray ta encurasha hobennan na Aruba pa considera e facultad aki como un posibilidad di estudio cu logicamente tin di haber tambe cu e parti di sostenebilidad pa trabounan di futuro cu ta varia hopi di trabounan di antes y actual. Esaki sigur ta un balor agrega na nos comunidad di Aruba y pa nos Hobennan.
