No ta un secreto cu hende muhe den e forsa laboral y den posicionnan halto di maneho y liderazgo no ta cos di tur tempo. Realidad awe ta cu hende muhe a introduci su mes poco poco mas den e forsa laboral durante transcurso di tempo y aki na Aruba no ta diferente. Tin hasta estudionan haci cu ta observa e diferencia y e desaroyo den esaki. Na 2006 “The World Economic Forum” a introduci hasta “The Global Gender Gap Index” cu ta indicenan pa observa e gap di diferente factor haciendo comparacion entre hende homber y hende muhe. Factornan manera educacion, salud, participacion y oportunidad economico y poder politico.
Tin diferente factor y obstaculo ta hunga un rol pakico hende muhe no a integra facilmente den e sector laboral, bay studia y cumpli cu deseonan ambicioso di ocupa posicionnan halto den comunidad y den politica. Mayoria parti un aspecto cu no ta haci’e facil ta famia, pa haya un bon balanse entre trabou, famia y responsabilidadnan domestico. Mirando cu e hende muhe lo tin deseo di forma su propio famia, organisa su bida familiar, porta yuda cu cuido di nos grandinan di nos famia ta haci e hende muhe su tareanan hopi pisa pa combina cu trabou y mas ainda den posicionnan importante di responsabilidad, di liderazgo y den politica.
Reflexionando riba dia di hende muhe, como un di e temanan di e dia aki pa 2021, mi ta reta hende muhenan pa ban amplia nos posibilidadnan mas, sostene otro hende muhenan den posicionnan clave y pa nos ta miho representa den politica! Pakico? Pasobra nos hende muhenan ta 52% di poblacion di Aruba y sin bo nunca nos lo yega na igualdad!
Feliz dia di hende muhe!
