Apenas 2 aña pasa, e aña cu e prome caso di COVID-19 a wordo registra na Aruba, nos a experiencia pa prome biaha un Aruba sin cu bishitantenan ta drenta of sali di nos isla. Nunca nos por a pensa cu den nos bida lo wak esaki na Aruba. Mundo henter a wordo afecta drasticamente pa e crisis causa pa e Pandemia y manera IMF a raporta, Aruba tabata un di e islanan mas afecta na mundo.

Den 24 luna despues cu COVID-19 a haci su entrada na Aruba unda turismo tabata ful plat y despues cu biaheronan no por a bay biaha manera antes mas, Aruba a yega bek na nivel di bishitantenan di 2019 y ta surpasando e cantidad. Pa Aruba aña 2019 tabata e miho aña den turismo pues mirando e ultimo 3 lunanan con e cantidad di bishitante ta surpasa Aruba su aña di record, ta un bon señal cu Aruba ta riba e bon trayecto di recuperacion.

Esfuersonan no tabata comun pa Aruba pa ya despues di 24 luna ta na e nivelnan di bishitante aki. Sigur tur instancia, gubernamental of priva, a haci esfuerso maximo pa yuda pa Aruba ta bek na e nivel pre-Covid a pesar cu awe ainda mundo henter tin di biba cu n’e. Mester menciona tambe cu e resultadonan aki ta refleho di e trabou intenso di tanto Ministerio di Turismo como Aruba Tourism Authority. Aruba y mundo henter no ta ‘business as usual’ mas den e mundo turistico pues awor mas cu nunca ta rekeri pensamentonan creativo y innovativo pa atrae bishitantenan di tur parti di mundo pa bishita nos isla chikito.

E señalnan di recuperacion na nivel di 2019 ta aporta grandemente na economia di nos pais. Esaki ta haci cu awor tin mas posibilidad di empleo y generacion di entrada sperando cu un y tur cu ta labora den e industria turistico por sali beneficia di e desaroyo aki. Por a tuma nota cu den luna di juni Revpar tabata surpasa nivel di 2019 cu mas cu 18% indicando cu empresanan hotelero tambe ta recuperando. Mas tanto empresanan cuminsa opera na normalidad, Aruba ta den rumbo pa un recuperacion total manera a wordo indica pa instancianan economico basa riba nan forecast.

Momento cu Aruba drenta den nivelnan di recuperacion total, finalmente Gobierno di Aruba tambe poco poco lo por recupera su ingresonan na nivel pre-Covid. Gobierno no solamente por cuminsa genera surplus den su presupuesto si no tambe por crea mas espacio pa cuminsa paga debenan. Rapportnan di instancianan economico na cuminsamento di Pandemia tabata indica cu den e area laboral, mirando cu Aruba ta asina dependiente di turismo, mas of menos 24 mil trahado lo perde trabou directamente of indirectamente. Gobierno cu curashi a busca un formula con Gobierno di Aruba lo por sostene e perdida di empleo aki principalmente den e sector di turismo. Pa esaki Aruba a fia casi 1 biyon florin di Hulanda pa asina absorba e efecto aki pa Aruba no crash. Awe tin un luz na horizonte unda cu sigur por pensa cu si turismo recupera, ta yegando tempo pa Gobierno su finansas tambe recupera y asina poco poco por mira Aruba bek riba e curso cu e tawata riba dj’e prome cu COVID-19, na un finansas mas duradero y sostenibel a pesar di e rastro laga atras causa pa e crisis di e Pandemia.