Parlamentario Rycond Santos do Nascimento tocante mocion di desconfiansa contra minister Glenbert Croes; “Ken ta e enemigo real di e pais aki?”

Despues cu den un reunion publico di 16 di april ultimo na Parlamento di Aruba e fraccionnan di partido MAS y AVP a entrega mocion di desconfiansa contra minister di Labor, Energia y Integracion, Glenbert Croes pa loke ta su maneho tocante tema di migracion, e parlamentario Rycond Santos do Nascimento ta puntra ken ta e enemigo real di e pais aki?

Tabatin un total di dos mocion cu a ser entrega na final di e reunion publico, e mocion number uno, tabata e mocion di desconfiansa contra minister Croes, entrega pa lider di fraccion MAS, parlamentario Marisol Lopez-Tromp y respalda pa fraccion AVP.

Mocion number dos tabata un mocion di fraccionnan di ACCION21 y RAIZ den cual nan ta urgi Gobierno di Aruba pa regularisa temporalmente personanan indocumenta cu ta cumpli cu rekisitonan pa salvaguardia y promove interes general. E mocion ta indica cu den caso cu minister Croes no por cumpli cu e deseo, ta pidi pa bolbe parlamento den 90 dia cu un splicacion pakico no por haci esaki.

Pa loke ta mocion number un di fraccion MAS y AVP, ta trata tocante e falta di maneho di parti di e minister en cuestion pa cu e cartera aki.

Sinembargo, den su ponencia den parlamento di dia 16 di april, Santos do Nascimento puntra su mes ken ta e enemigo real di e pais aki? Ken ta e peliger di mas grandi pa Estado di derecho den pais aki?”

Den esaki, e ta splica cu aña pasa specificamente dia 14 di april corte di prome instancia a condena ex-minister di Infrastructura di Aruba y actual miembro di Parlamento di Aruba Oslyn Benito Sevinger (Benny) pa un castigo di prizon parcialmente incondicional di 1 aña, di cual 6 luna ta condicional, pa corupcion y malversacion cu un tempo di prueba di 3 aña.

Hues a dicidi ademas cu Sevinger ta wordo saca for di derecho electoral y cu ta kita tur derecho di dje pa carga cualkier funcion den servicio di pais Aruba pa un duracion di cinco aña. Corte den prome instancia ta considera cu, door di laga otronan corumpi’e, Sevinger a bergonza y debilita gravemente e confianza den un gobierno cu ta actua na un manera integro.

E hecho cu e corupcion aki a bira conoci a resulta den daño grave na e imagen di pais Aruba, door di cual inversionistanan por aleha di haci inversionnan na Aruba. Sevinger ademas a usa su fundacion politico pa su mes ganashi financiero, loke ta atacha e confianza di e ciudadano den politiconan.

E mesun dia ey cu sentencia a bira conoci, manera Santos do Nascimento ta señala, “Mike Eman a sali bisa cu hues a duna Benny algo di castigo pa scapa cara di OM, bo sa ki esey ta nifica? Cu lider di un partido na Aruba ta tilda e hues di ta partidario, ta tilda hues di ta corupto, e hues cu ta defendiendo Estado di derecho di e pais aki, anto e ta papia di e ‘Bon Comun’ trociendo e nificacion di kico e bon comun ta, anto kico e fruta ta? Pasobra na e fruta bo ta conoce e palo, kico e fruta ta? E yiunan politico di Mike Eman a cuminsa bisa ‘Paul Croes ta manera un Nelson Mandela, inhustamente cera, anto b’a wak kico a pasa cu e caso te na Hoge Raad, esey ta e realidad cu nos ta biba den e pais aki,” el a sigura.

Den su ponencia, Santos do Nascimento ta considera cu e intencion di e mocionnan ta pa baha minister Glenbert Croes “pa pone e otro minister aki, esey ta e realidad, mi no ta bisando cu e minister ta santo, mi no ta ni sikiera defendiendo e minister, lo cual mi ta bisa ta cu ora nos ta wak kico a pasa e ultimo aña aki, un aña mirando atake riba Landsrecherche, atake riba Ministerio Publico, atake riba hues, esey ta e frutonan di Sr. Mike Eman, esey ta e bon comun cu e ta papia di dje, troce e berdad, gaña e pueblo y priminti bo coy loco,” el a sigura.

Continuando cu su declaracion, e ta indica cu “nos a culpa Benny, nos a culpa Paul, nos a lubida full e caso den cual tin hopi friends and family, pero nos no ta papiando di esun cu a permiti laga y por ta hasta fomenta, pakico fomenta? Pasobra ken tabatin e probecho ultimo di e corupcion cu ta tuma luga cu tabatin di haber cu financiamento politico?” el a puntra.

Asina mes, e ta sigura cu si tin hende cu ta cuestiona Santos do Nascimento pa motibo cu e tabata forma parti di e partido berde, “bo mes tabata parti di nan” y pa esaki e ta expresa “bo tin rason, si bo tin critica contra a mi awe bo tin rason, e ta trece nos back na e mocion di awe, ora bo ta bay vota bo no por kita bo bril y bisa cu Glenbert Croes ta e corupto mas grandi di e pais aki, pasobra esey ta lo cual esaki ta bisa, mi no ta defendiendo Glenbert, lo cual mi ta bisa ta, ora bo ta vota e mocion aki pensa kico bo ta bisando e comunidad aki, kico ta bo mensahe riba e futuro di e pais aki ora cu un mucha ta bay den mal caminda.”

Pa Santos do Nascimento e mocionnan contra minister Croes no ta pa simplemente vota riba dje “e ta un mocion pa nos dicidi riba e pais aki, anto e ora bo ta dicidi riba e pais aki puntra bo mes ken ta enemigo real di e pais aki,” el a finalisa.

Di e mocion entrega pa parlamentario Lopez-Tromp el a remarca cu nan ta entrega e mocion pasobra nan no tin niun confiansa mas den minister Glenbert Croes su manera di maneha, su proceduranan, su falta di transparencia y otro puntonan.

“Nos a splica hopi cla cu nos ta retira nos confiansa den su persona como minister pa guia procesonan pa pais Aruba y consecuentemente nos lo vota sosten pa cu e mocion cu nos mes a entrega,” el a subraya.

Pa loke ta e mocion di fraccionnan ACCION21 y RAIZ, el a splica cu na e manera cu e mocion ta skirbi y con e ehecucion mester ta, Lopez-Tromp a ratifica cu nan no tin confiansa pa esaki sucede den minister Croes su man.

Pa loke ta votacion riba e mocion di desconfiansa, 12 parlamentario a vota contra, cual tabata fraccionnan di MEP y RAIZ y parlamentario independiente Ryçond Santos do Nascimento. Fraccion AVP y MAS y parlamentario independiente Gerlien Croes a vota na fabor di e mocion aki y fraccion ACCION 21 a abstene di vota.