Mi por a tuma nota cu colega Parlamentario sra.drs. Marisol Lopez-Tromp, den nomber di Fraccion-MAS a haci un peticion pa un reunion publico cu Prome Minister sra.mr. Evelyn Wever-Croes pa atende e asunto di werksternan di SKOA y invalskrachten di DPS.

Prome Minister a manda contesta sra.Marisol cu no ta su persona e mester a dirigi e peticion sino na Minister sr. drs. Rudy Lampe cu ta esun encarga cu e Ministerio di Enseñansa y cu si Fraccion MAS ta desea un “opfriscursus” (=refresher course) riba Derecho Constitucional e por regla esaki cu DWJZ mesora.

Aparentemente esun cu mester un “opfriscursus” di Derecho Constitucional ta e propio Minister-President mes y esaki cu hopi urgencia.Pakico?

Pasobra e proposicion cu nos Constitucion conoce solamente responsabilidad ministerial individual no ta basa riba berdad. Nos Constitucion conoce dos tipo di responsabilidad ministerial politico, esta(1) e responsabilidad politico individual di cada minister y (2) e responsabilidad politico colectivo cu ta encera tur minister hunto.

Conseho di Minister ta wordo encabesa pa e Minister-President y pa esmotibo tambe Gabinetenan ta wordo yamana e nomber di e Prome Minister. Bisando esaki, esey ta nifica cu Parlamento por manda yama un minister so – individualmente –pa duna cuenta, pero Parlamento por tambe manda yama mas minister of hasta henter e team di minister (= Gabinete) mes pa aclarea of duna cuenta na Parlamento di un of mas asunto.

Den caso cu Parlamento no keda satisfecho cu e hustificacion di e minister of di e Gabinete, Parlamento por baha e minister(nan) en cuestion y manda esaki cas of Parlamento por manda henter e team di minister cas tambe.

E posicion di e Prome Minister ta wordo consideracomo“Primus inter pares”.E tin e tarea pa coordina maneho di gobierno y como‘Prome’Ministere ta esun prome cu ta ser yama pa responsabilisa su mes na Parlamento: hustamente esey ta parti di carga e responsabilidad politico colectivo. Semper mester corda cu ministernan ta tuma e decisionnan di mas importante den forma colectivo den Conseho di Minister.

Tur minister mester papia cu un boca encuanto maneho di gobierno. No tin espacio pa tira culpa riba e maneho di otro. Ora cu un Minister no ta di acuerdo cu e posicion colectivo di e Conseho di Minister, e mester entrega su retiro (homogeniteitsregel). Tur studiante di Derecho na Aruba, Corsou y Hulanda sa esaki desde e prome aña di nan estudio.

Pues ta di lamenta cu Prome Ministersra. Evelyn Wever-Croes a vocifera su pensamento eroneo di un forma arogante (‘betuttelend’), demostrando asina un sentido di superioridad cu no ta sirbi’e ya cu mas bienta su persona a demostra su propio ignorancia riba Derecho Constitucional.

Y papiando di ignorancia di Derecho Constitucional y di “opfriscursus” mihor Prome Minister organisa un curso asina berdad,pero pa su propio Partido MEP cu e ta lidera.

Pakico? Pasobra den e afan di Prome Minister pa a retira Minister Marisol Lopez-Tromp aña pasa, su Presidente di Parlamento, sr. AdyThijsen a demostra na henter pueblo cu e la dicidi di viola nos Constitucion y viola tambe e Reglamento di Ordo di Parlamento, ya cu Constitucion y e Reglamento di Ordo ta exigi quorum o sea un mayoria di Parlamento pa por tuma un decision legitimo. Apesar cu no tabatin un quorum na e momento ey, sr. Ady Thijsen no kier a haci caso di e hecho aki y a permiti e votacion riba tres mocion sigui su curso, unda hasta na momento di votacion un Parlamentario, den e caso aki, sr. Alan Howell di Fraccion-POR, no tabata ni presente den sala di Parlamento y a laga conta su voto como uno di aprobacion. Despues di tur e confusion aki, e Presidente di Parlamento sr. AdyThijsen a keda insisti cu loke cu a sosode e anochi anterior ta uno legal, apesar cu diferente Parlamentario a critica su persona riba esaki y a desaproba su proceder.

Mas tristo ta cu despues di e sucedido aki Prome Minister sra. Evelyn Wever-Croes a apoya sr. AdyThijsen den tur su ruedanan di prensa.

Un par di dia despues nos por a tuma nota den prensa cu sr. AdyThijsen sin cu e la pone Parlamento na haltura, a manda un carta riba su mes pa Gobierno, informando nan cu e tres mocion nan no tabata valido y cu e ta declara nan nulo. Parlamentario sra. Daphne Lejuez, a pidi sr. Ady Thijsen aclaracion riba esaki y pa e haya un copia di e carta en cuestion aki. Aparentemente sr. Thijsen a nenga di duna Parlamentario sra. Daphne Lejuez esaki y kier a evita na tur manera pa sra. Lejuez obtene e documentonan pertinente di e sucedido.

Esaki ta otro violacion flagrante di parti di sr. AdyThijsencomo Presidente di Parlamento, ya cu un Parlamentario ta un representante di Pueblo y tin derecho di obtene e informacion aki.Nos ta spera cu no ta sra. Evelyn mes a duna e tarea ingrato aki na sr.Thijsen. En todo caso ta keda obvio cu nos gobernantenan na poder no ta domina Derecho Constitucional ni den teoria ora ta duna conseho, ni den practica ora mester aplica Derecho Constitucional, segun Parlamentario Ryçond Santos do Nascimento