Aparentemente e preguntanan di parlamentario Ryçond Santos do Nascimento encuanto fraude na Censo y DIMP tin partido MEP den Damage Control Mode. Pa cuminsa MEP kier kita enfoke di Pueblo riba e falta di maneho di integridad y den e di dos luga MEP kier pa Pueblo kere cu den e escalando di fraude di Censo y DIMP ta Minister President ta victima di algun appel putri. E strategia di comunicacion di MEP ta pa tira tur culpa riba un empleado na Censo y un empleado na DIMP pa malversacion di miles di florin (en total casi un miyon).Asina ta logra tapa e negligencia di gobierno den e cuestion aki. E ta un lastima cu hustamente e partido cu ta plak un stikker cu e mensahe ‘Grow Up’ no ta adopta un strategia di liderazgo y puntra na forma serio y profesional:Kico a pasa precies? Con esaki por a tuma luga? Y Kico gobierno lo haci pa evita cu esaki ta bolbe tuma luga?
Parlamentario Ryçond Santos do Nascimento kier pa MEP splica con ta posibel cu MEP a pone integridad, bon gobernacion y bon finansas publico como prioridad number 1 y toch nos comunidad ta haya cu corupcion ta creciendo na Aruba. Esaki ta paso MEP no kier haci nada of MEP no tin e capacidad pa haci algo?Cu Pueblo ta haya cu corupcion ta creciendo a ser confirma pa un encuesta di Banco Central na 2020. Esey ta hiba nos na e pregunta dicon MEP no a percura pa nos tin e landsbesluit nobo conteniendo e Corporate Governance Code? MEP a sinta cuater aña y si no a traha riba su prioridadnan, riba kico si nan a traha? Ademas nos mester puntra dicon tampoco no tin un Gedragscode Integriteit pa e aparato gubernamental? E ta un falta di seriedad pa MEP sali bisa cu integridad ta un prioridad, pero ni sikiera a regla un landsbesluit cu ta regla esaki. Corda cu e proceso pa bin cu un landsbesluit ta mas facil y mas lihe, pasobra no mester di aprobacion previo di parlamento.
MEP kier saca potret bieu y linea di atake di un politica anticua, mencionando Utilities, WEB y Erlimar sin kier papia di locual ta pasando actualmente den nos entidadnan publico. Parlamentario Ryçond Santos do Nascimento ta mustra riba e rapport di e Institute for Governance & Leadership cu a raporta recientemente,dia 20 di december 2020, cu 40% di nos entidadnan publico ta traha sin reglementen, sin profielschetsen, no ta notula nan reunionnan, no ta midi e performance di nan directornan periodicamente, no tin procedura pa nombramento di bestuurders etc. Tur esaki bao responsabilidad di un Minister-President di MEP. Locual ta mas erg ainda ta cu ora a investiga e huntanan di supervicion nan no ta cumpli cu 47.2% di normanan di bon gobernacion. Parlamentario Ryçond Santos do Nascimento ta haya cu e ta sumamente decepcionante cu e partido cu mas ta grita integridad kier kita enfoke riba e problemanan aki. MEP kier mustra dede riba gobiernonan anterior, siendo cu ta MEP ta den e posicion di responsabilidad.
